باۋىرجان مىرزاباەۆ: قازاقتىڭ ناعىز اتبەگى حالىق ەكەنىن شەتەلدە دالەلدەپ جۇرگەن ەشكىم جوق

Bauyrzhan M.5

باۋىرجان مىرزاباەۆ ەۋروپاعا تانىمال شاباندوز. التى جىلدا 2000-عا جۋىق بايگەگە قاتىسىپ, سونىڭ 350-گە جۋىعىنان جۇلدە العان. 1992 جىلى الماتى وبلىسىندا دۇنيەگە كەلگەن باۋىرجان بۇگىندە گەرمانييادا تۇرادى. وتكەن سەنبى كۇنى ول جوكەيلەر اراسىندا “ەۋروپا چەمپيونى” اتاعىن جەڭىپ الدى. قازاق حالقىنىڭ ەجەلدەن ات باپتاعان, تاستاقىم شاباندوز ۇلت ەكەنىن تانىتىپ جۇرگەن جەرلەسىمىزدى بىر-ەكى اۋىز اڭگىمەگە تارتقان ەدىك.

- باۋىرجان, اڭگىمەنى اۋەلى وزىڭنىڭ تۋىپ وسكەن جەرىڭ, اتا-اناڭ تۋرالى باستاساق.
- الماتى وبلىسى, كەربۇلاق اۋدانى شۇبار اۋىلىندا تۋىپ وستىم. اكە-شەشەم الى سول اۋىلدا تۇرادى. بىر ىنىم, ەكى قارىنداسىم بار. ىنىم چەحييادا جۇمىس ىستەيدى. ال وزىم گەرمانييادا تۇرىپ جاتىرمىن.

- اتقا شابۋدى, شاباندوزدىقتى قاي كەزدە باستادىڭ؟
- بالا كەزدەن اۋىلدا وستىم عوي. وزىمىزدىڭ ۇيدە ازىناۋلاق جىلقىمىز بولدى. اكەم دە ارا-اراسىندا جۇيرىك باپتايتىن ەدى. سول ارقىلى جىلقىعا, جۇيرىك اتقا دەگەن قىزىعۋشىلىق پايدا بولىپ, ول ەسەيە كەلە كانىگى شاباندوزدىققا باستاۋ بولدى. جەتى جاسىمنان باستاپ الاماندا شاباندوز بولا باستادىم.

Bauyrzhan M.6

- وزىڭ ات جاراتاسىڭ با؟
- جوق. ات باپتاۋعا مەن ارالاسپايمىن. مەنىڭ قازىرگى مىندەتىم تەك قانا اتقا شابۋ. ياعني شاباندوز (جوكەي) مىندەتىن اتقارۋ. بۇل جاقتا اتتى وزىڭ باپتاپ, وزىڭ بايگەگە قوسىپ, وزىڭ شابا بەرۋگە بولمايدى. ولاي جاساۋعا زاڭدى تۇردە تىيىم سالىنعان.

- سەن قاشاننان بەرى شەتەلدە تۇراسىڭ؟ ەۋروپاعا قالاي بارىپ جۇرسىڭ؟ ول جاققا جوكەي بولۋعا شاقىردى ما؟
- نەگىزى 2009 جىلدان بەرى ەۋروپادا تۇرامىن. اراسىندا 8 ايداي ەلگە بارىپ قايتتىم. ال ناقتى بۇل جاقتىڭ ليتسەنزيياسىن الىپ, شاباندوز بولۋدى 2012 جىلى مامىر ايىندا باستادىم. بۇل جاقتا جوكەي بولۋ ۇشىن قازاقستاننان ادام ىزدەمەيدى عوي. وسى ورايدا بۇرىن الماتى يپپودرومىن باسقارعان نۇرلان تىلەۋلەسوۆ اعاما العىس ايتقىم كەلەدى. كىشكەنتايىمنان شاباندوز بولعىم كەلەتىنىن ەستىپ, وسى جاقتاعى تانىستارى ارقىلى مەنى جىبەردى. وسىندا كەلگەن سوڭ وزىم دە قاراپ جاتپاي ىزدەنىپ, وز-وزىمدى دامىتىپ شاباندوز بولدىم.

- گەرمانييادا تۇراسىڭ. نەمىس تىلىن جاقسى بىلەسىڭ بە؟
- تىم كەرەمەتپىن دەپ ايتا المايمىن. بىراق وزىمە كەرەك دۇنيەلەردى سۇراپ بىلە الامىن. الى دە ۇيرەنىپ جۇرمىن. ال چەح تىلىن قازاقشامەن بىردەي مەڭگەردىم دەسەم بولادى.

- ەۋروپا مەن قازاقستاننىڭ ات باپتاۋىندا, بايگەسىندە ايىرماشىلىق بار ما؟
- ەكى جاقتىڭ ات باپتاۋىنىڭ اراسى جەر مەن كوكتەي عوي. ەلدە اتقورانىڭ جاعدايىنىڭ وزى مۇلدە بولەك, ال مۇندا بارلىعى تەك ات ۇشىن جاسالعان. تۇراتىن قوراسىنان باستاپ, جەم-شوپ, دارى-دارمەك, ۆيتاميندەرىنە دەيىن ەڭ جاقسىلارى تاڭدالىپ الىنعان. جىلقى مەديتسيناسى دا جاقسى دامىعان. قازاقستاندا بىز اتتىڭ قاي جەرىندە نە بولىپ, قانداي جاعدايدا تۇرعانىن بىلە المايمىز. بايگەگە قوسقاننىڭ جونى وسى دەپ مىنە سالىپ شاپقىلاي بەرگەنگە مازبىز. شىنىن ايتار بولسام, قازاقستاننىڭ ۇشقىر اتتاردى باپتاۋى شەتەلمەن سالىستىرعاندا 100 جىلعا ارتتا قالىپ قويعان دەۋگە بولادى.

Bauyrzhan M.2

- قازاقستاننان ات اپارىپ, بايگەگە قاتىساتىندار بار ما؟
- ونداي باپكەر جوق. بىراق, وسى جاقتان ساتىپ الىپ, وسى جاقتا بايگەگە دايىنداپ قوساتىن قالتالى ازاماتتار بار. الايدا, جوعارى دارەجەدە ناتيجە كورسەتىپ جاتقانى جوق. ال قازاقستاننان ات الىپ كەلىپ قوسىپ, بۇل جاقتا بايگە الۋ قيىن.

- تازا قاندىلار مەن قازاقتىڭ قاراپايىم جىلقىسىن سالىستىرۋ قيىن. دەگەنمەن, بىزدىڭ بايگە اتتارىنىڭ مۇمكىندىگىمەن ەۋروپالىق جۇيرىكتەردى سالىستىرىپ كوردىڭ بە؟ قازاق جىلقىسى نەسىمەن ارتىق دەپ ويلايسىڭ؟
- سالىستىرۋعا كەلمەيتىن سەكىلدى. سەبەبى ەلدەگى بايگەگە قوسىلىپ جۇرگەن جۇيرىكتىڭ بارلىعى دەرلىك تازا قاندى اتتار. بارىن شەتەلدەردەن ساتىپ العان. شەتەلدەن اپارماعاندارىنىڭ وزىنىڭ ارعى لينيياسى – اكەسى نە ەنەسى شەتەلدىك تازاقاندىلار. قازىر الامانعا دا, ۇشقىرعا دا اعىلشىن اتتارىن قوساتىن بولدى.
ال سالىستىرۋ كەرەك بولسا, شەتەلدە تورتىنشى-بەسىنشى ورىن الاتىن اتتار قازىرگى كەزدە قازاقستانعا ساتىلىپ كەتىپ جاتىر. بىر سوزبەن ايتقاندا, شەتەلدە تومەن كورسەتكىش كورسەتكەندەر بىزدىڭ ەلگە بارادى. ال قازاقى قاراپايىم جىلقىمەن سالىستىرار بولساق, قازاقى جىلقى سالت مىنىپ جۇرۋگە جانە سوعىمداعى قازى-قارتاسىمەن عانا الدا تۇر. سەبەبى قازاقتىڭ قاراپايىم جىلقىسى ۇشقىر بايگە ۇشىن جارالماعان.

- بۇعان دەيىن قانشا بايگەگە قاتىستىڭ؟ قانشا رەت «ۇزدىك جوكەي» اتاعىن الدىڭ؟
- قازاقستاندا جۇرگەن كەزدە تىم جوعارى ناتيجە كورسەتكەن جوقپىن. ال وسى جاققا كەلگەلى بەرى 2000-عا جۋىق بايگەگە قاتىستىم. سونىڭ 350-گە جۋىعىندا ۇتتىم. اۋەلى چەحيياعا كەلىپ, سول جاقتا شاباندوزدىقتى باستادىم. ول جەردە 2013, 2014, 2015 – ۇش جىل قاتارىنان چەمپيون بولدىم. وندا جىل بويى كىم ەڭ كوپ بايگە ۇتادى, سول جوكەي چەمپيون بولىپ سانالادى. قازىرگى كەزدە گەرمانييادامىن. بۇل جەردە چەمپيون ەمەسپىن, بىراق شاباندوزداردىڭ اراسىندا العاشقى وندىقتامىن.

Bauyrzhan2

- قانشا شاباندوز بار؟
- شاباندوز كوپ. 100-دەن اسا جوكەي بار. ال وتكەن سەنبى كۇنى ۇتقان جۇلدەم «ەۋروپا چەمپيونى» اتاعى (سۋرەتتە – رەد.). مۇندا 15 مەملەكەت قاتىستى. ار مەملەكەتتەن 1 شاباندوز قاتىسادى. مەن قازاقستان اتىنان شىقتىم. جىلىنا بىر رەت قانا وتەدى. بىر كۇندە 7 بايگەگە قاتىسىپ, سودان ەڭ كوپ ۇپاي جيناعان ادام جەڭىمپاز بولادى. ال نەگىزگى چەمپيوناتتىڭ ەرەجەسى بويىنشا جىل بويى قاي شاباندوز كوپ بايگە ۇتادى, جىل سوڭىندا سول چەمپيون اتانادى. ات باپكەرلەرى دە, اتتىڭ يەسى دە تۋرا وسى ەرەجە بويىنشا جەڭىمپاز اتانادى. جەڭىمپازعا چەمپيوندىق دارەجە مەن اقشالاي سىيلىق بەرىلەدى.

- جوكەي بولۋ مەن الاماندا شاباندوز بولۋدىڭ ايىرماشىلىعى بار ما؟
- جوكەي دەگەن سول شاباندوزدىڭ حالىقارالىق اتاۋى عوي. نەگىزى ەكەۋى بىر ۇعىم. ال بىزدىڭ الامەن بايگە مەن شەتەلدىڭ ۇشقىر بايگەسىنىڭ ايىرماشىلىعى ۇلكەن. مىسالى مۇندا قاشىقتىق تا, شاباندوزدىڭ اتقا وتىرىسى دا, سالماعى دا, بارى قاتاڭ تارتىپ بويىنشا ەسەپتەلەدى. بىزدىڭ الاماندا كىمنىڭ شاباندوزى جەڭىلدەۋ, كەيدە اتتىڭ شابىسى سوعان بايلانىستى بولىپ كەتەدى. جانە 18 جاسقا تولماعان, سالماعى جەڭىل بالالار شابا بەرەدى. ال مىنا جاقتا وزىڭە ارنايى ليتسەنزييا الىپ, بارلىق تالاپتارىن ورىنداپ شابۋىڭ كەرەك.
ۇشقىردا وزدەرىڭىز كورىپ جۇرگەندەي, تارتىپ قاتاڭ, ال الاماندا بالانى مىنگىزەسىڭ دە, جىبەرەسىڭ. ول بالانىڭ بايگەگە شابۋدا قانشا تاجىريبەسى بار, قالاي شابادى – بارى وزىنىڭ ۇيرەنگەنى بويىنشا عانا. ونداي بالادان جاۋاپكەرشىلىك تە تالاپ ەتە المايسىڭ. جانە وسىپ, سالماق قوسقان سوڭ ول اتقا شابا المايدى. نە جوكەي بولا المايدى. بەلگىلى بىر ۋاقىتتا عانا شاباندوزدىقپەن اينالىسادى دا, سوڭىندا قالادى. ارى كەتسە باپكەر بولادى. وندا دا وزىندە اتى بار بولسا, ايتپەسە سول جاس كەزىندە شاباندوز بولعانىمەن عانا قالادى. سودان كەيىن باسقا سالاعا كەتۋىنە تۋرا كەلەدى. ال ۇشقىر بايگەنىڭ شاباندوزى, ياعني جوكەي بولۋ – بارلىق تالابىن ورىنداپ وتىرساڭ ومىر بويى اينالىساتىن كاسىپ.

Bauyrzhan M.3

- جوكەي بولۋ ۇشىن قويىلاتىن تالاپتار جايلى ايتساڭ؟ قانداي تالاپتارى بار؟
- اۋەلى جوكەيلەردى دايىندايتىن مەكتەپتى ۇش جىل وقىپ شىعاسىڭ. ونى بىتىرگەن كەزدە ساعان ديپلومنىڭ ورنىنا ليتسەنزييا بەرەدى. ليتسەنزييا قولىڭىزعا تيگەن سوڭ عانا سىز جوكەي بولا الاسىز. ودان كەيىن وزىڭ سەكىلدى شاباندوزدار اراسىنداعى باسەكەلەستىكتەن وزۋىڭ كەرەك. جاي عانا شاباندوز بولساڭىز سىزگە ەشكىم اتىن بەرە بەرمەيدى. مىسالى, 100 جوكەي بولسا, شاباتىن اتتىڭ سانى 10-15-اق. سوندىقتان اتسىز قالماس ۇشىن وز شەبەرلىگىڭىزدى شىڭداي تۇسۋىڭىز كەرەك. اتقا دۇرىس شاپپاساڭىز, اتپەن تىل تابىسا الماساڭىڭ كەلەسىدە ات يەسى سىزگە جۇيرىگىن بەرمەي قويادى. باسقا بىر جوكەيگە تاپسىرىپ جىبەرەدى.
وز باسىم اپتاسىنا ۇش-تورت كۇن, كۇنىنە 6-7 بايگەگە قاتىسۋعا تىرىسامىن. سەبەبى باستى جۇمىسىم سول. گەرمانييا, چەحييا, پولشا, فرانتسيياعا دەيىن بارىپ اتقا شابامىن. كۇنىم جول مەن ات ۇستىندە وتەدى.

- وزىڭ مىنىپ شاباتىن اتتار تۋرالى ايتساڭ؟
- مەندە تۇراقتى ات جوق. قازىر بىر بايگەگە قاتىسىپ كەلسەم, كەلەسى بايگەدە قانداي اتقا شاباتىنىمدى وزىم بىلمەيمىن. بىر اپتا بۇرىن بايگەگە قوسىلاتىن اتتاردىڭ تىزىمى جارييالانادى. سول كەزدە ات باپكەرلەرى مەنىڭ جەكە مەنەدجەرىمە حابارلاسادى. بىر كۇندە 6-7 اتقا شاباتىن بولسام, بارلىعىنىڭ باپكەرىمەن, يەسىمەن كەلىسەدى. ال كوپتەگەن باپكەرلەر مەن ات يەلەرى وز اتىنا ساي شاباندوز ىزدەيدى. تەك بايگە كەزىندە عانا تاقىمىمىز تيىپ, باسقا ۋاقىتتا تۇرىن دە كورمەيتىن نەبىر ساڭلاقتار بار.
وز اتقورامىزدا دا جۇزگە تارتا ات بار. ولارعا دا مىنىپ بايگەگە قاتىساتىن كەزدەرىم بولادى. بىراق كوبىندە قاي كەزدە قانداي اتقا مىنىپ, قانداي بايگەگە قاتىساتىنىمدى وزىم دە بىلمەيمىن. ويتكەنى الداعى بايگەدە قاي ەلدەن, قاي قالادان قانداي ات كەلەتىنىن, ونىڭ قايسىسى سەنىڭ تاقىمىڭا تيەتىنىن بىلۋ قيىن. جانە ول جەردە بىرنەشە عانا ەت ەمەس, تەك وسى ەكى-ۇش اتقا عانا شابام دەيتىن. جىلىنا 400-500 بايگەگە قاتىساتىن بولسام, وعان قاتىساتىن اتتار دا سان الۋان بولادى.

Bauyrzhan M.4

- بىر رەت بايگەگە شاپقانىڭ ۇشىن قانشا تولەيدى؟
- بىر بايگەگە شاپقانىم ۇشىن 75 ەۆرو تولەنەدى. ونىڭ سىرتىندا ار مەملەكەتتىڭ وز ەرەجەسىنە ساي العان جۇلدەنىڭ 5 پايىزى ماعان تيەسىلى. ال بايگە بولماعان كۇندەرى جاتتىعۋدا بولامىن. ول كۇندەرىم ۇشىن جەكە ايلىق تولەنەدى.

- سەن جارىسقا قاتىسقان كەزدە كىمنىڭ جۇيرىگىنە مىنسەڭ دە قازاقستان اتىنان شىعاسىڭ با؟ الدە ات يەسىنىڭ مەملەكەتى اتىنان قاتىساسىڭ با؟
- جۇيرىك قاي ەلدىكى بولسا, سول ەلدىڭ اتىنان شابامىن. وتكەن سەنبى كۇنگى بايگە جىلىنا بىر رەت قانا وتەتىندىكتەن, ار جوكەي وز ەلىنىڭ اتىنان قاتىستى.

- يا, ايتپاقشى, بوس ۋاقىتىڭ بولا ما, ونداي كەزدە نە ىستەيسىڭ؟
- بوس ۋاقىت كوپ بولمايدى. اسىرەسە جازعى بايگە ماۋسىمى باستالعان كەزدە تىپتى ۋاقىت جەتىسپەي كەتەدى. مىسالى بۇگىن جاتتىعۋدان كەلدىم, ەرتەڭ تاعى جاتتىعۋ. جۇما كۇنى وسىدان 500 شاقىرىم جەردە بىر قالادا بايگە وتەدى سوعان بارۋىم كەرەك. سەنبى كۇنى دە بايگەدەمىن. ودان كەيىن وسىندا كەلىپ, جاقىن جەردە بىر بايگە بار, جەكسەنبى كۇنى سوعان قاتىسامىن. ۇش كۇن قاتارىنان بايگەدە بولامىن. بىر سوزبەن ايتقاندا, كۇندىز بايگە, تۇندە جول ۇستىندەمىن. دۇيسەنبى عانا دەمالىس.
نەگىزى بايگە ماۋسىمى اياقتالعان, قىسقى ۋاقىتتا ازداپ بوس ۋاقىت بولىپ قالادى. ونداي كەزدە ۋاقىت تاۋىپ ەلگە, اتا-اناما بارىپ كەلۋگە تىرىسامىن. بولماسا وسىندا ەل ارالاپ, قالا ارالاپ, قىدىرعاندى جاقسى كورەمىن.

Bauyrzhan M.1

- كۇندە اتقا شابۋ شارشاتپاي ما؟
- اتقا شابۋ بولعاندا, قازاقستانداعىداي 30-40 شاقىرىمعا تاڭنان كەشكە دەيىن شاپقىلاي بەرمەيسىڭ عوي. ۇشقىر بايگە بولعاندىقتان, بىر بايگە 2-3 مينۋتقا عانا سوزىلادى. سوندىقتان اتقا شابۋ قيىندىق تۋدىرمايتى, كەرىسىنشە سالماق ۇستاۋ قيىن. كۇندە جۇگىرىپ, سالماق قۋىپ, ديەتا ۇستاۋ كەرەك. وز باسىم سالماعىم تىم جەڭىل ەمەس, سوندىقتان ۇنەمى وز-وزىمدى بابىمدا ۇستاۋعا تىرىسامىن. اتقا شابۋ دەگەن – ادرەنالين. بايگەدەن ۇتقاندا ەلدىڭ بارى سەنى قولپاشتاپ جاتقان كەزدە بارلىق شارشاعانىڭدى ۇمىتىپ كەتەسىڭ.

- ەلگە كەلىپ, جوكەي مەكتەبىن اشىپ, جاستاردى تاربيەلەگىڭ كەلمەي مە؟
- قازاقستاندا وسى سالا بويىنشا تالانتتى بالا كوپ. كومەكتەسىپ, تاربيەلەپ, جولعا سالىپ جىبەرسە, مەنەن دە مىقتى شاباندوزدار شىعاتىنىنا سەنىمدىمىن. وكىنىشتىسى سول, ولارعا باعىت-باعدار بەرىپ, جون كورسەتىپ جاتقان ەشكىم جوق. وعان قاراجات جاعى دا جەتكىلىكسىز.
ال جوكەي مەكتەبىن اشىپ, ولارعا كومەك كورسەتۋگە كەز كەلگەن ۋاقىتتا دايىنمىن. بىراق, جوكەي مەكتەبىن اشپاس بۇرىن, اۋەلى ەلدەگى ات سپورتىنىڭ جاعدايىن كوتەرۋىمىز كەرەك. 30 شاقىرىمعا شابۋ ارقىلى بىز وزىمىزدىڭ مىقتىلىعىمىزدى ەشقاشان شەتەلگە دالەلدەي المايمىز. «قازاق جىلقىمەن بىرگە جارالعان» دەپ ۇيدە وتىرىپ ايتقانىمىزبەن, شەتەلگە شىعىپ ەشقايسىمىز ايتا المايمىز. وزىمىزبەن وزىمىز بولىپ قالا بەرەمىز. قازاقتىڭ ناعىز شاباندوز, ناعىز اتبەگى حالىق ەكەنىن شەتەلگە كەلىپ ەشكىم دالەلدەپ جاتقان جوق. ال ونى مويىنداتۋ ۇشىن بىز وسى ۇشقىر بايگەنى جەتىلدىرۋىمىز كەرەك. سودان كەيىن عانا جوكەي مەكتەبىن اشىپ, شەتەلمەن باسەكەگە تۇسۋىمىزگە بولادى. مىسالى, ار جىلى قىستا دۋبايدا كارنابال وتەدى. شەت ەلدەردەن كەلىپ نەشە تۇرلى جۇيرىكتەر قاتىسادى. بىزدىڭ دە تۋرا سونداي دەڭگەيدە وتكىزۋىمىزگە بولادى. ول ۇشىن ۇشقىر بايگەنى وتە جوعارى دەڭگەيگە كوتەرۋىمىز كەرەك.
سودان كەيىن عانا باسقاسىن قولعا الۋعا بولادى. بىزدە جوكەيلەردى ۇيرەتەتىن ادامدار دا, مەكتەپ اشامىن دەسە عيمارات تا تابىلادى. تەك قاراجاتقا عانا تىرەلەدى. دەگەنمەن بۇل سالانى مەملەكەت وز قاراماعىنا السا, وندا شەشىمىن تابار ەدى. ونداي جاعداي بولسا, تالاي ادامعا جۇمىس تابىلار ەدى, تالاي قالتالى ازامات بۇل سالانىڭ دامۋىنا وزدەرى-اق جۇمىس ىستەيتىن ەدى. ەگەر ۇكىمەتتەن قولداۋ بولماسا, ەشكىم وز قالتاسىنان شىعارىپ, بۇل جۇمىستى ىستەي قوياىن دەمەيتىنى بەلگىلى. سول باياعى الامانىمىزبەن ايدالادا شاۋىپ قالا بەرەمىز.
بۇل سالانى دامىتۋ ۇشىن قولعا الاتىن ىستىڭ بىرى – يپپودرومدار سالۋىمىز كەرەك. ونسىز بولمايدى. وز باسىم, وسى ىسكە قارجى قۇيامىز, كەلىپ ىستە دەسە كەزكەلگەن ۋاقىتتا بارىپ, قولعا الۋعا دايىنمىن. ال اۋ باستان باستاپ ىستەۋگە ازىرگە شامامىز كەلمەيدى.

Bauyrzhan M.

- يپپودروم دەمەكشى, ەلدەگى يپپودرومعا قانداي باعا بەرەسىڭ؟ جوكەي رەتىندە بىراز اتشابارلاردا بولعان شىعارسىڭ قازاقستاندا؟
- يپپودرومدارعا باعا بەرگەن كەزدە… جامانداي بەرگەن دە جامان ەكەن… يپپودروم دەپ ايتۋعا كەلەتىن بىر عانا الاڭ – الماتى يپپودرومى عوي. وتە جاقسى جەرگە ورنالاسقان, وتە جاقسى تريبۋناسى بار. بىراق اتشابار جولىن جاقسارتىپ, تريبۋناسىن قايتا جوندەۋدەن وتكىزسە, حالىقارالىق دارەجەدەگى يپپودروم عوي. ال باسقا قالالاردىڭ اتشابارلارىندا بولعان ەمەسپىن. مەنىڭ ويىمشا سول بىر يپپودرومنىڭ وزىن جاقسىلاپ جوندەپ, قالپىنا كەلتىرسە, بىراز دارەجەسى كوتەرىلىپ قالار ەدى. مەن شاباندوزدىق جولىمدى سول الماتى اتشابارىندا باستاعامىن. ول كەزدە نۇرلان تىلەۋلەسوۆ باسقارىپ تۇرعان ەدى. وتكەن جىلى قىستا بارسام, بارلىعى دا ەسكىرگەن, توزىعى جەتىپ, ارەڭ تۇر.

- داستۇرلى الامانعا ۇيرەنىپ قالعان حالىق ۇشقىر بايگەنى قىزىقتاي ما؟
- بىزدىڭ ەلدەگى كوپ ادام ۇشقىر قىزىق ەمەس, بايگە كورگەندەي بولمايسىڭ دەيدى. وعان كەلىسەمىن. بالەن عاسىر بويى الامانعا شاپقان حالىققا بىر كۇندە ۇشقىردى تاماشالا دەۋ وڭاي ەمەس. بىراق شەتەلمەن, ات بايگەسى دامىعان ەلمەن باسەكەلەسەمىز دەسەك, وزىمىزدىڭ ناعىز جىلقىمەن بىتەقايناسقان ۇلت ەكەنىمىزدى تانىتامىز دەسەك, ۇشقىردى دامىتۋعا كوڭىل بولۋىمىز كەرەك. ۇشقىر بايگە اتتىڭ دارەجەسىنە كوپ كومەكتەسەدى. ونىڭ سىرتىندا سەلەكتسييا جۇرىلەدى. الامان بايگەگە بۋداندار, تازا قاندىلار, قاراپايىم قازاقى جىلقى بارى قوسىلا بەرەدى. ال مۇندا تەك قانا پاسپورتپەن, ەرەجەمەن عانا جارىسادى. سول ۇشىن بىزگە ۇشقىرعا قارجى قۇيىپ, ۇشقىردىڭ باپكەرلەرىن, جوكەيلەرىن دايىنداپ, سول ارقىلى شەتەلگە شىعۋ كەرەك.

- قانداي ارمانىڭ بار؟
- مەنىڭ ارمانىممەن ەشتەڭە وزگەرە قويماس. دەگەنمەن قۇدايدان تىلەرىم بار, بىر كۇنى “ات سپورتى مەملەكەتتىڭ قاراماعىنا وتتى, اقشا بولىنەدى, وسى سالاعا بىر كومەگىڭدى تيگىز” دەپ شاقىراتىن شىعار دەپ ويلايمىن. سول كۇندى ارماندايمىن. قۇداي بۇيىرسا ول كۇن دە بولار.

- ۋاقىت بولىپ, سۇقباتتاسقانىڭا راحمەت!

فوتو: كەيىپكەردىڭ جەكە قورىنان

erzhan-zhaubaiەرجان جاۋباي, argymaq.kz

دوباۆيت كوممەنتاريي

ۆاش e-mail نە بۋدەت وپۋبليكوۆان. وبيازاتەلنىە پوليا پومەچەنى *

Please Do the Math      
 

موجنو يسپولزوۆات سلەدۋيۋششيە HTML-تەگي ي اتريبۋتى: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>