روم اۋەسحان: بايان-ولگييدە ۇلتتىق سپورتتىڭ دامۋى ەندى قارقىن الىپ كەلەدى

Rom

جاقىندا الماتىدا جاستار جىلى اياسىندا ۇلتتىق ات سپورتىنان جاستار اراسىندا تۇڭعىش ازييا چەمپيوناتى وتكەن بولاتىن. قر ۇلتتىق سپورت تۇرلەرى قاۋىمداستىعى ۇيىمداستىرعان سايىسقا موڭعولييا رەسپۋبليكاسى بايان-ولگيي ايماعىنان دا سپورتشىلار كەلگەن ەدى. جاستاردى باستاپ كەلگەن بايان-ولگيي ايماعى قازاق ۇلتتىق سپورت تۇرلەرى فەدەراتسيياسىنىڭ باسشىسى روم اۋەسحاننان سول ەلدەگى ۇلتتىق سپورتىمىزدىڭ جاي-كۇيى جايلى سۇراعان ەدىك.

- روم اۋەسحانۇلى, قازاقستانعا قوش كەلىپسىز! اۋەلگى سۇراق, ولگەيدەگى قازاق ۇلتتىق سپورتىنىڭ بارىسى قالاي؟

- موڭعولييا حالقىن قۇرايتىن نەگىزگى ەكى ۇلت بار. بىرى – موڭعول ۇلتى بولسا, ەكىنشىسى, بىز – قازاق ۇلتىمىز. موڭعول حالقى دا كوشپەندى ومىردى ساقتاپ وتىرعان نەگىزگى حالىق. تىپتى, قازىرگى تاڭدا كوشپەندىلىك سالتتى ۇستانىپ, ونى دارىپتەپ, جالپى حالىقتىڭ 50-60%-ى الى دە كوشپەندى ومىر سۇرىپ وتىرعان بىردەن-بىر ەل. «حالقىڭ قالاي بولسا, بوركىڭ سولاي» دەگەندەي, سول ەلدى مەكەندەپ وتىرعان ات توبەلىندەي ازعانا قازاق تا, وزىنىڭ اتا-بابادان كەلە جاتقان سالتىن ساقتاپ, كوشپەندى ومىردەن قول ۇزبەي, ۇلتتىق تىلىن, دىلىن, سالت-داستۇرىن جوعالتپاي كەلەدى.

ال وسىنداي ورتادا وتىرعاندىقتان, ۇلتتىق سپورتتى كەشەگى بابالارىمىزدان مۇراعا الىپ, كەلەر ۇرپاققا اماناتتاۋ بىزدىڭ پارىزىمىز. كوكپار, اۋدارىسپاق, تەڭگە ىلۋ, جامبى اتۋ سپورتتارىن موڭعول اعايىندارمەن بىرلەسە وتىرىپ, دامىتىپ كەلەمىز. ارينە, بۇل سپورتتار قازاق ۇلتىنىڭ ۇلتتىق سپورتى بولىپ سانالاتىنى انىق. دەيتۇرعانمەن, اتالعان سپورتتاردان بولەك, اسىق اتۋ, توعىزقۇمالاق, ساياتشىلىق جانە قازاق كۇرەسى قاتارلى قازاقتىڭ ۇلتتىق سپورتى موڭعولييادا جاقسى دامىپ كەلەدى.

ۇلتتىق سپورتىمىزدىڭ موڭعوليياداعى از قازاقتىڭ ورتاسىندا دامۋىنا سول ەلدەگى وسى سالاعا جاۋاپتى مەكەمەلەردىڭ, مەملەكەتتىڭ قولداۋىمەن قاتار, 2013 جىلدان بەرى قازاق ەلىنىڭ دە قولداۋى, ىقپالى زور ەكەنىن ايتا كەتكەن جون. مىسالى, قازاقستاندا ۇيىمداستىرىلاتىن حالىقارالىق سايىستارعا, ازييا چەمپيوناتتارى, الەم چەمپيوناتتارى بايان-ولگييدە قازاق ۇلتتىق سپورتىنىڭ قالىپتاسىپ, بىر ىزگە تۇسۋىنە ايرىقشا ىقپال ەتتى. سونىڭ ناتيجەسىندە ولگييدە ۇلتتىق سپورت قاۋىمداستىعىنىڭ وز كوماندالارى قۇرىلىپ, حالىقارالىق سايىستارعا قاتىسىپ, جۇلدەلى ورىندارعا قول جەتكىزىپ كەلەدى.

- بايان-ولگييدە قانشا كوكپار كومانداسى بار؟

- بۇعان دەيىن موڭعولييا قازاقتارى كوكپاردى كوماندا بولىپ ويناپ كورمەگەن. 2013 جىلى قازاق ەلىنىڭ ەلورداسىندا وتكەن العاشقى ازييا چەمپيوناتىنا (ەرەسەكتەر اراسىندا – رەد.) شاقىرۋ العاننان كەيىن, بىز وز ايماعىمىزدا كوماندا قۇرىپ, كوماندالىق كوكپاردى قولعا الا باستادىق. العاش رەت ەلىمىزدە جىل سايىن وتەتىن بۇركىتشىلەر فەستيۆالى اياسىندا كوماندالىق كوكپاردى وتكىزىپ كوردىك. وسىدان باستاپ, جالپى كوكپارعا قىزىعۋشىلىعى بار اۋدانداردان ىرىكتەپ, 5 كوماندا قۇرعانبىز. سول كوماندالار اراسىندا ايماقتىق بىرىنشىلىك وتكىزدىك. بۇل – بۇعان دەيىن موڭعولييا قازاقتارىنىڭ اراسىندا كوكپار ويىنى بولمادى دەگەن سوز ەمەس. اتا-بابالارىمىز قوبدا بەتىندە جاپپاي كوكپاردى دا, جەكپە-جەك كوكپاردى دا شەبەرلىكپەن ويناي بىلدى. اسىرەسە ۇلكەن-ۇلكەن تويلاردا جەكپە-جەك كوكپار مىقتى دامىعانىن ايتا كەتكەن جون.

ارينە, ار زاماننىڭ وز ەرەكشەلىگى بار. قازىر بارلىعى جۇيەلەنگەن. بارلىعى ەرەجە بويىنشا كوماندالىق كوكپاردىڭ دامۋ قارقىنى جاقسى. سوندىقتان بىز دە, وز كەزەگىمىزدە كوماندالىق كوكپاردى دامىتۋعا بەيىمدەلىپ كەلەمىز. ونىڭ بىر كورىنىسى 2017 جىلى ەكسپو اياسىندا قازاقستان استاناسىندا وتكەن العاشقى الەم چەمپيوناتىنا قاتىستىق. جاقىندا وتكەن جاستار اراسىنداعى العاشقى ازييا بىرىنشىلىگىنە باق سىنادىق. اللا بۇيىرسا, قاراشادا وزبەكستان استاناسى – تاشكەنت قالاسىندا وتەتىن ىى الەم چەمپيوناتىنا قاتىسامىز دەپ جوسپارلاپ وتىرمىز.

- موڭعوليياداعى قازاق ۇلتتىق سپورتى تۇرلەرىنە جەكە-جەكە توقتالىپ كەتسەڭىز…

- اۋدارىسپاق بۇعان دەيىن بىزدە بولماعان, قازاق ەلىندە وتەتىن سايىستاردى كورىپ, ۇيرەنۋ ارقىلى قازىر جاقسى جولعا قويىلىپ كەلەدى. بىرنەشە رەت ايماقتىق سايىس وتكىزدىك. ارينە, ەل چەمپيوناتىن وتكىزۋ ۇشىن اۋەلى حالىقتىڭ كەمىندە 20-30%-ى وسى سپورتپەن اينالىسۋى كەرەك, جاپپاي سيپات الۋ كەرەك. بىز بۇل دەڭگەيگە ازىر جەتكەن جوقپىز, ەرەجەلەردى قالىپتاستىرىپ, ويىنشىلارىمىزدى دايىنداپ جاتىرمىز. اۋەلى اۋداندىق دەڭگەيدە, سوسىن بارىپ ايماق دەڭگەيىندە بىرىنشىلىك وتكىزىپ جۇرمىز.

وسى ازىن-اۋلاق تاجىريبەمىزبەن حالىقارالىق, الەمدىك تۋرنيرلەردە باق سىناپ كەلەمىز. ازىرگە ناتيجەمىز دە جامان ەمەس, قازاق ەلىنىڭ سپورتشىلارىنان كەيىنگى قىرعىز قۇراماسىمەن ۇزەڭگى قاعىستىرىپ جۇرمىز.

ال تەڭگە ىلۋ سپورتىنا كەلەر بولساق. بىز ۇشىن ەجەلدەن بەرى كەلە جاتقان, ەتەنە تانىس ويىن تۇرى دەۋگە بولادى. الايدا, موڭعولييا قازاقتارى ۇشىن بۇل سپورتتىق دارەجەگە كوتەرىلگەن ەمەس. ولاي دەيتىنىم, قازىرگى قازاق ەلىنىڭ سپورتشىلارى سەكىلدى تۇراقتى اينالىسقان ەشكىم جوق. بار بولعانى, توي-تومالاقتا حالىقتىڭ كوڭىل كوتەرىپ, جاس جىگىتتەردى سىنالتاتىن باسەكەسى رەتىندە عانا تانىلىپ كەلدى.

سوڭعى بىرنەشە جىلدان بەرى قازاق ەلىندەگى تەڭگە ىلۋ سايىسىنىڭ ەرەجەسىن قابىلداپ, وزىمىزدە دە دامىتۋدى قولعا الىپ كەلەمىز. سونىڭ ناتيجەسىندە حالىقارالىق تۋرنيرلەرگە قاتىسۋ مۇمكىندىگىنە يە بولدىق. اتاپ ايتار بولساق, بۇگىنگە دەيىن ۇش رەت ازييا چەمپيوناتىنا قاتىستىق. العاشقىسىندا 3-ورىندا بولساق, ەكىنشىسى وتكەن جىلى استانادا وتتى, وندا تورتىنشى ورىندى تۇتتىق. جاقىندا عانا الماتىدا وتكەن جاستار اراسىنداعى ى ازييا چەمپيوناتىندا ەكى سپورتشىمىز جۇلدەلى ورىننان كورىندى.

- ار سپورت تۇرىنە جەكە-جەكە سپورتشى دايىندايسىزدار ما؟

- مۇمكىندىگىنشە سولاي ىستەۋگە تىرىسامىز. بىراق, جىگىتتىڭ, سپورتشىنىڭ سانى جەتكەنىمەن, قارجى ماسەلەسى دە بار. سوندىقتان, تەڭگە ىلۋگە كوكپارشىلارىمىز قاتىسا بەرەدى. بۇل ازىرگە بىز ۇشىن تيىمدى بولىپ تۇر. سەبەبى بىرنەشە سپورت تۇرىنە بىر سپورتشى عانا قاتىسادى.

- جامبى اتۋ سپورتى دا جاقسى دامىعان بولار سىزدەردە؟ موڭعول اعايىنداردىڭ بۇل سپورت تۇرىن جاقسى دارىپتەيتىنىن بىلەمىز…

(روم اۋەسحان الماتىدا وتكەن جاستار اراسىنداعى تۇڭعىش ازييا چەمپيوناتىنا اكەلگەن جامبى اتۋ مەرگەندەرىمەن بىرگە)

- يا, ونىڭ راس. جامبى اتۋ سپورتى – موڭعول حالقىنىڭ ەجەلدەن كەلە جاتقان سپورتىنىڭ بىرى. بۇنىڭ بىزگە دە ىقپالى تيمەي جاتقان جوق. جەرگىلىكتى جەردەگى جانە ۇلانباتىرداعى موڭعولييا ات ۇستىندە ساداق اتۋ فەدەراتسيياسىمەن بىرلەسە وتىرىپ, جامبى اتۋدى بىر جولعا قويدىق دەۋگە بولادى. سونىڭ ناتيجەسىندە جامبى اتۋ سپورتىنداعى قۇرامدى تولىقتاي ۇلتى موڭعول ازاماتتاردان جاساقتادىق. سول قۇراممەن قازىرگى كەزدە تۇرلى سايىستارعا قاتىسىپ كەلەمىز. وسى جولعى جاستار چەمپيوناتىنا دا موڭعول جاستارىن الىپ كەلدىك. بىر سپورتشىمىز قولا جۇلدەگە يە بولدى.

- قازاق ۇلتتىق سپورتى مەملەكەتتىك دەڭگەيمەن العاندا موڭعولييا ۇشىن ەتنوستىق قانا سپورت بولىپ سانالادى عوي. دەگەنمەن, موڭعولييا ۇكىمەتىنىڭ قولداۋى قالاي؟

- قايدا بارساڭىز دا دەمەۋشىلىكسىز, قولداۋسىز سپورت دامىمايدى. سول سەكىلدى كەز كەلگەن ەلدەگى قانداي سپورت تۇرى بولماسىن مەملەكەتتىڭ ىقپالىنسىز ناتيجە بەرمەيدى. ارينە, بىز عانا ەمەس, موڭعولييانىڭ وز ۇلتتىق سپورتتارى دا بار. مىسالى, بايگە, ساداق اتۋ, موڭعول كۇرەسى, اسىق اتۋ, تۇيە پولو, ت.ب. دەگەندەي. بۇل سپورتتار موڭعولييادا وز فەدەراتسيياسى قۇرىلعان, ازدى-كوپتى وز كورەرمەنى بار, جولعا قويىلعان. سول سەكىلدى, قازاق ۇلتتىق سپورتى – كوكپار, اۋدارىسپاق, تەڭگە ىلۋ, جامبى اتۋ, توعىزقۇمالاققا دا مەملەكەت كوڭىل اۋدارا باستادى. سەبەبى, حالىقارالىق جارىستاردا, ازييا چەمپيوناتتارىندا, الەم بىرىنشىلىكتەرىندە, ەلارالىق تۋرنيرلەردە بىز موڭعولييا اتىنان قاتىسىپ, سول ەلدىڭ تۋىن كوتەرىپ, انۇرانىن شىرقاتىپ, جۇلدەلى ورىندارعا يە بولىپ, ەلدىڭ جاقسى يميدجىنە جۇمىس اتقارا باستادىق. وسىنى ەسكەرگەن موڭعولييانىڭ بىلىم, مادەنيەت جانە سپورت مينيسترلىگىنىڭ, سپورتتىق اگەنتتىكتەردىڭ قازاقتىڭ ۇلتتىق سپورتىنا دەگەن جاقسى كوزقاراس قالىپتاسىپ كەلەدى.

- الداعى جازدا اۋدارىسپاقتان چەمپيونات وتكىزگەلى جاتقاندارىڭىزدى ەستىدىك, دايىندىق قالاي بولىپ جاتىر؟

- بيىلعى جازدا اۋدارىسپاقتان ازييا چەمپيوناتىن وتكىزگىمىز كەلگەن. وزىڭ بىلەتىندەي, وتكەن جىلعى چەمپيونات قازاقستاندا وتكەن بولاتىن. نەگىزىندە ول قازاقستاندا ەمەس, بايان-ولگەيدە, موڭعولييادا وتۋى كەرەك ەدى. وكىنىشكە قاراي, جازدا تابيعي جاعدايعا بايلانىستى شەگەرىلدى. (وتكەن جازدا بايان-ولگييدە نوسەر جاڭبىر سالدارىنان سەل تۇسىپ, 800-گە جۋىق وتباسى زارداپ شەككەن بولاتىن – رەد.) اللا بۇيىرسا, بيىل وتكىزەمىز بە دەپ وتىرمىز.

نەگىزى حالىقارالىق دارەجەدەگى, كولەمدى سايىس بولادى دەپ وتىرمىز. ال ناقتى ۋاقىتقا كەلەر بولساق, شىلدە ايىندا وتەدى دەپ جوسپارلانۋدا. سايىس بايان-ولگيي ايماعىنا قاراستى ساقساي دەگەن اۋدان بار, بيىل سول اۋداننىڭ 60 جىلدىق مەرەيتويى, سول توي اياسىندا جۇرىلەدى. قازىرگى كەزدە وسى سايىستىڭ كەلىسىمشارتتارى, ۇكىمەت تاراپىنان رۇقسات الۋ, دەمەۋشىلەر مەن قاتىسۋعا ۇمىتكەر مەملەكەتتىردى تىزىمدەپ, حابارلاندىرۋ بەرۋ جۇمىستارى جۇرگىزىلىپ جاتىر.

- چەمپيوناتتى نەگە ساقساي اۋدانىندا وتكىزۋدى جوسپارلادىڭىزدار؟ بايان-ولگييدىڭ وزىندە وتكىزۋگە بولماس پا ەدى؟

- بىرىنشىدەن, جاڭا ايتىپ وتكەنىمدەي, اۋداننىڭ 60 جىلدىعى, مەرەكەگە مەرەكە ساي كەلدى. ەكىنشىدەن, بىزدەگى ۇلتتىق سپورتقا, ۇلتتىق قۇندىلىققا كوبىرەك بەيىم اۋدان وسى – ساقساي. سونىمەن قاتار, جاقىندا الماتىدا وتكەن جاستار اراسىنداعى ى ازييا چەمپيوناتىندا اۋدارىسپاقتان 80 كەلىدەن جوعارى سالماقتا التىن العان ابسوليۋتتى چەمپيون جەڭىسبەك سەرىكۇلى دا سول ساقسايدىڭ تۋماسى. سوندىقتان دا بىز بۇل جولعى ازييا چەمپيوناتىن ساقسايدا وتكىزۋدى ۇيعارىپ وتىرمىز.

(اۋدارىسپاقتان 80 كەلىدەن جوعارى سالماق دارەجەسىندە ازييا چەمپيونى اتانعان جەڭىسبەك سەرىكۇلى)

- بۇعان دەيىن كوكپاردان ازييا بىرىنشىلىكتەرىنە, العاشقى الەم چەمپيوناتىنا كەلدىڭىزدەر. الداعى كۇزدە تاشكەنتتە ىى الەم چەمپيوناتى وتەدى. قاتىسۋ ويدا بار ما؟

- ارينە, اللا بۇيىرسا, قاتىسامىز. جاقسى دايىندىقپەن بارىپ, باعىمىزدى سىناپ كورمەكپىز. ودان باسقا دا بىرنەشە جارىس جوسپاردا بار. دايىندىق دەمەكشى, وسى ورايدا بىر ايتا كەتەر جايت بار. ول – قۇراماداعى جىگىتتەردىڭ كوبى جاز جايلاۋعا شىعىپ كەتەدى, كۇزدە شوپ-شالاڭ, كوشى-قون, قورا-قوپسىنىڭ جوندەۋى دەگەن سەكىلدى, كۇندەلىكتى تىرشىلىكتەن قولدارى بوساماي قالادى دا, كوماندالىق قۇراممەن دايىندالۋ اقساڭقىراپ قالادى. سول تىرلىكتىڭ ورتاسىندا, قول قالت ەتكەندە كوكپاردىڭ, اۋدارىسپاقتىڭ جىگىتتەرى دايىندىق جاسايدى.

- كوكپار ويىنىندا ات ماسەلەسىن قالاي شەشىپ جۇرسىزدەر؟ موڭعول جىلقىسى الاسا, قازاقستاندا ات بويشاڭ. الاسا اتپەن ۇيرەنگەن ازاماتتار, قازاقتىڭ تۇرقى بيىك جىلقىسىنا ۇيرەنىسە الماي قالماي ما؟

- ورىندى سۇراق. باسقا ەلدەردە كوكپارعا, اۋدارىسپاققا, تەڭگە ىلۋگە دەپ جەكە-جەكە ات دايىنداپ, باپتايدى. بىز كوماندالىق كوكپار ويناساق تا, كوكپار اتى دەپ جەكە ات ۇستامايمىز. وعان مۇمكىندىك تە جوق جانە ايماقتىق ۇلتتىق سپورت قاۋىمداستىعى دا ونداي ات بەرە المايدى. ار ويىنشى وز اتىمەن وينايدى.

ارينە, بيىك ات پەن الاسا جىلقىنىڭ ايىرماشىلىعى بار. سوعان قاراماستان, ەپتى كوكپارشىلار ات بويىنىڭ ايىرماشىلىعىن ەلەڭ قىلمايدى.

سونىمەن قاتار, كوماندالىق كوكپارداعى تاعى بىر كەدەرگى – ات ابزەلدەرى. ارينە, كۇندەلىكتى قولداناتىن ابزەلدەر جەتكىلىكتى. بىراق ول كوكپار سەكىلدى ۇلكەن دودالارعا كەلمەيدى. كوكپار ەرىن جاسايتىن شەبەر جوق. ەرشىلەر كوپ, بىراق كوكپار ەرىنىڭ وزىندىك ەرەكشەلىگى بار عوي. ول اتقا دا, ادامعا دا قاۋىپسىز, اتقا تيمەيتىن, تاقىمعا باتپايتىنداي ەتىپ جاسايتىن ەرشى جوق.

- اڭگىمەنى جاستار اراسىندا وتكەن تۇڭعىش ازييا چەمپيوناتىنا بۇرساق. وزىڭىز الىپ كەلگەن جاستاردىڭ ويىنىنا كوڭىلىڭىز تولدى ما؟

- بىز ب توبىندا رەسەي, قىتاي, تاجىكستان قاتارلى كوكپاردا وزىندىك ورنى بار ەلدەرمەن قاتار تۇستىك. العاشقى ويىندى تاجىكستان جاستارىمەن وتكىزدىك. وڭاي قارسىلاس ەمەس. تاجىكستان – جاپپاي كوكپار جاقسى دامىعان ەل. سوعان قاراماستان قۇداي ساتىن سالىپ, 2:0 ەسەبىمەن ۇتتىق. دەگەنمەن جىگىتتەر جاقسى ويىن كورسەتە المادى. وعان جاڭبىر – اۋا رايىنىڭ قولايسىزدىعى سەبەپ بولدى.

توپتىق كەزەڭدەگى ەكىنشى قارسىلاسىمىز – قىتاي قۇراماسى بولدى. وندا دا وزىمىز سەكىلدى, قىتايدا تۇراتىن قازاق جاستارى. كوكپار ەجەلدەن تامىرى ۇزىلمەگەن ول جاقتا. وزىڭىز جاقسى بىلەتىندەي, بۇعان دەيىن ولار سەركەنى «گارگا» دەپ اتالاتىن باسكەتبولدىڭ تورى سەكىلدى اسپاعا سالاتىن. سوڭعى بىرنەشە جىلدان بەرى ولار دا شەڭبەرگە ويناي باستادى. سودان بەرى ولاردىڭ دا سەركەنى الىپ جۇرۋى, 20-25 كەلى سەركەنى جەردەن ىلىپ الۋ, جەكپە-جەكتە سايىسۋ بارلىعى دا جاقسى دامىپ كەلەدى. ارينە, سايىستا بىرەۋ جەڭىپ, بىرەۋ جەڭىلەتىنى زاڭدىلىق. قىتاي قۇراماسىمەن ويىنىمىز 5:3 بولىپ بىزدىڭ جەڭىسىمىزبەن اياقتالدى.

رەسەي قۇراماسى دا, بىز ۇشىن ۇزەڭگىلەس كوماندالاردىڭ بىرى. توپتىق كەزەڭدە بىزدىڭ كوماندانىڭ فينالعا شىعۋىنا وسى رەسەيدەن كەلگەن كوماندانى جەڭۋىمىز سەبەپ بولدى. مۇندا دا ەسەپتى بىزدىڭ جىگىتتەر 5:3-كە جەتكىزدى. ارينە, كورشى مەملەكەتتەر بولعان سوڭ بۇعان دەيىن دە بىرنەشە رەت كەزدەسكەن كوماندالار. وز سىرلارىن وزدەرى بىلەدى, كىمنىڭ قاي دەڭگەيدە وينايتىنىنا دا سىرالعى بولىپ قالعان.

(جاستار اراسىنداعى تۇڭعىش ازييا چەمپيوناتىندا كۇمىس جۇلدەگە يە بولعان موڭعولييا قۇراما كومانداسىن بۇكىلالەمدىك ەتنوسپورت كونفەدەراتسيياسىنىڭ پرەزيدەنتى بيلال ەردوعاننىڭ ماراپاتتاۋ ساتى)

ال ەندى جاستار اراسىنداعى تۇڭعىش چەمپيوناتتا كۇمىس جۇلدەگە يە بولۋ بىز ۇشىن ۇلكەن مارتەبە. جانە فينالدا كوكپارداعى ازۋلى قارسىلاس – قازاقستان قۇراماسىمەن كەزدەسۋ, ەسەپتى 8:4-كە جەتكىزۋ – بىزدىڭ جاستارعا جەڭىسپەن تەڭ.

- سوز سوڭىندا بىر سۇراق قويايىن. بىزدىڭ ەستۋىمىزشە, موڭعولييادا بىر جاقسى داستۇر بار. ياعني, بىر مىقتى سپورتشىنى نەمەسە بىر جۇيرىك اتتى بىر كومپانييا وز قاراماعىنا الىپ, سونىڭ جارىسقا قاتىسۋىنا جاعداي جاسايدى. بايان-ولگەيدەگى قالتالى, ىقپالدى ازاماتتار مۇنداي مارتتىك تانىتىپ, بىرەۋ بىر سپورت تۇرىن وز قاراماعىنا الىپ, جاعدايىن جاساپ بەرۋگە مۇمكىندىگى بار عوي؟..

- يا, راس ايتاسىڭ, موڭعول حالقىندا سونداي بىر جاقسى داستۇر بار. بۇل ۇردىس جايلاپ بايان-ولگەيگە دە كەلىپ جاتىر. ازىرگە قالتالى ازاماتتارىمىز بايگە اتتارىنا جاعداي جاساۋدى قولعا الىپ كەلەدى. دەگەنمەن, ۇلتتىق سپورتىمىزعا, كوكپار مەن اۋدارىسپاققا, تەڭگە ىلۋ مەن جامبى اتۋ, توعىزقۇمالاق پەن اسىق اتۋعا قول ۇشىن سوزاتىن ازاماتتار سانى الى دە كەمشىن. ۇلتتىڭ رۋحىن, حالىقتىڭ ەڭسەسىن كوتەرەتىن ۇلتتىق دۇنيەتانىمىمىزعا جاقىن سپورت تۇرلەرىن كوپتەپ قولدايتىن, بىرلەسە جۇمىس ىستەيتىن جىگىتتەرگە الى دە زارۋمىز.

- اڭگىمەڭىزگە راقمەت!

Erzhan Zhaubaiەرجان جاۋباي, argymaq.kz

دوباۆيت كوممەنتاريي

ۆاش e-mail نە بۋدەت وپۋبليكوۆان. وبيازاتەلنىە پوليا پومەچەنى *

Please Do the Math      
 

موجنو يسپولزوۆات سلەدۋيۋششيە HTML-تەگي ي اتريبۋتى: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>