اتتى تۋر. تورتىنشى كۇن. جىلقىشى راحمەت

Atty tur

24 ماۋسىم, دۇيسەنبى. كيىز ۇيدە جىلى كورپەگە ورانىپ جاتىپ, ۇزىكتى سىتىرلاتا ۇرعان جاڭبىر تامشىلارىنا قۇلاق تۇرىپ, بۇيىعىپ جاتقان قانداي تاماشا.

تاڭعى 7-دە ويانساق تا, ۇي سىرتىندا سىركىرەگەن جاڭبىرعا قۇلاق تۇرىپ جاتىرمىز بارلىعىمىز. ەشكىمنىڭ وسى بىر تىنىشتىق اۋەنىن بۇزعىسى كەلمەيتىندەي. الايدا العا قويعان ماقسات, مەجەلى مىندەتىمىز بار, اتقا قونۋعا تۋرا كەلدى.

الدا بۇيراتاۋدىڭ بۇلىڭ-بۇلىڭىن ارتقا تاستاپ, قىزىلتاس القابىن كەسىپ وتىپ, ايگىلى عالىم الكەي مارعۇلان اتىنداعى اۋىلعا قونالقاعا جەتۋىمىز كەرەك.

بۇيراتاۋدىڭ بوكتەرىندەگى جالعىز ۇي – قورىقشىلار قوسىنىن ارتقا تاستاپ, باتپاقتى بۇلاقتى جاعالاپ جولعا شىقتىق.

IMG_1920.jpg

جول بويىندا كورگەن بىر قىزىق قۇبىلىس – قانشا الىستا جۇرسە دە, ادام قاراسىن كورگەن جىلقى بىتكەن سول ماڭعا جينالا قالاتىنى. جول بويى بىزگە جولىققان بىر ۇيىر جىلقى دا داۋىس جەتەر جەردەن شاپقىلاپ, بىزدىڭ قاسىمىزعا كەلدى.

جىلقى كورسە ارقاسى قوزاتىن قازاقپىز عوي, بىز دە داۋىرىگە ايعايلاپ, جىلقىنى بىراز جەلىكتىرىپ قويدىق. جاڭبىردان سوڭ شيرىعىپ تۇرعان جانۋارلار, ارى-بەرى ويقاستاپ, وز سۇلۋلىقتارىن پاش ەتكەندەي ەكپىندەي بارىپ باسىلدى.

IMG_1926.jpg

جىلقىلاردان ۇزاعان سوڭ, سىركەلەگەن جاڭبىردان بۇيىعىپ, تاعى دا ۇنسىز, كوندىككەن, الىس ساپارعا تاس-تۇيىن بەكىنگەن جۇرىسپەن سىدىرتا جورتتىق. بۇگىن جاۋىننان قورعالادى ما, بىزگە دۋگلاستان باسقا سالت اتتى ەرمەدى.

ايتپاقشى, العاشقى كۇنگى شارشاۋدان سوڭ دۋگلاس دەميگە ەمەس, پرينتسكە مىنگەن. جۇرىسى جايلى, يتبۇلكەكپەن عانا جۇرەتىن پرينتس دۋگلاس ۇشىن تاپتىرماس تۇلپار بولدى.

جول بويى ايتارلىقتاي وزگەرىس بولا قويعان جوق. دىتتەگەن ۋاقىتتا قىزىلتاس اۋىلىنا كەلىپ جەتتىك.

اۋىل تىپ-تىنىش. تۇسكى ۋاقىتتا كەلدىك. اۋىلداعى ۇلكەن الباردا جۇزدەن استام جىلقى قاماۋلى تۇر ەكەن. «ە, بيە بايلاپ, قىمىز اشىتىپ وتىرعان اۋىل بولدى عوي» دەپ ويلادىق. سوندا دا, سالقىن كۇن, تاپاداي تالتۇس, جىلقىنىڭ قاماۋلى تۇرعانىن تۇسىنە المادىق.

«باقسام, باقا ەكەن» دەگەندەي, بۇل جىلقىنىڭ سىرىن بىز ات باسىن تىرەگەن ۇيدىڭ وتاعاسى بايان وماربەكوۆ اعامىزدان بىلدىك.

IMG_1944.jpg

«قورادا تۇرعان جىلقىنى ايتاسىڭ با؟ ول وسى اۋىلدىڭ جىلقىسى. بيە بايلاپ وتىرعامىز جوق. جەر جەتپەيدى. ماڭاي تولعان ەگىن. جىلقىنى وسىلاي كۇندىز قاماپ قويىپ, تۇندە عانا شىعارىپ, ەگىنگە تۇسىرمەي جايامىز» – دەيدى بايان اعامىز.

وزى دە شاعىن شارۋاسىن دوڭگەلەنتىپ وتىرعان ازامات, جىل سايىن جەر تارىلىپ بارا جاتقانىن ايتادى.

IMG_1949.jpg

اۋىل بالالارىنىڭ بىر ەرەكشەلىگى – جىلقى دەسە جانىن بەرەدى. بايان اعامىزدىڭ نەمەرەسى دە اتقا مىنۋگە قۇشتار ەكەن. «الاش» اتقا مىنىپ, الاش ۇشىن اقىرىپ تەڭدىك سۇرار ۇل بولعىسى كەلەدى.

قىزىلتاستان اتتانىپ, الكەي مارعۇلان اۋىلىنا بەت تۇزەدىك.

بايان اعامىز, «جولدان اۋىتقىماي جۇرسەڭدەر, تۋرا سول اۋىلعا اپارادى, ارالىق 29-30 شاقىرىم بولىپ قالار» دەدى, اتتانىپ بارا جاتقاندا.

بىز جول جيەگىن جاعالاي, ات باسىن وڭتۇستىك شىعىسقا تۋرالادىق. اۋىلدان 10-12 شاقىرىم شىققاندا الىستان بىزگە قاراي شوقىراقتاتىپ كەلە جاتقان سالت اتتىنى كوردىك.

IMG_1966.jpg

استىنداعى قۇلا بەستىنى اق سورپا ەتىپ تەرلەتكەن, جىلقىشى جىگىت, بارلىعىمىزبەن امانداسىپ, قايدا بەت العانىمىزدى سۇرادى. باعدارىمىزدى بىلگەن سوڭ بىردەن جولدان اۋىتقىعانىمىزدى ايتتى.

«قازاقتا «بىر جول بار – الىس, الىس تا بولسا جاقىن, بىر جول بار – جاقىن, جاقىن دا بولسا الىس» دەگەن سوز بار. باكەڭ سىزدەر اداسپاسىن دەپ, «الىس تا بولسا جاقىن» جولعا سالعان عوي. مەن وسى جەردىڭ جەرگىلىكتى جىلقىشىسىمىن. اساكاروۆكاداعى قۇرعاق ساۋمال وندىرەتىن زاۋىتتا جىلقى باعامىن. قازىر سىزدەرگە تۋرا جولدى كورسەتىپ جىبەرەيىن» – دەدى جىلقىشى راحمەت.

وزى دە ايدالادا جەلمەن جارىسقان جىلقىمەن بىرگە جىلقىداي ساياق جۇرىپ ۇيرەنگەن قازاق بىراز اڭگىمەنىڭ باسىن قايىردى. سونىمەن راحمەتتىڭ ايتۋىمەن, الكەي اۋىلىنا تىكە تارتتىق.

15 شاقىرىمداي بىزبەن بىرگە جۇرگەن راحمەت مارعۇلان اۋىلىنىڭ مۇعدارى كورىنگەندە ايىرىلستى.

پاۆلودار مەن قاراعاندىنى جالعاپ جاتقان ايگىلى ساتپاەۆ ارناسىنىڭ بويىندا ورنالاسقان شاعىن اۋىل بىزدى جىلى قارسى الدى.

kF4cUoqA.jpeg

اتتاردى ارنايى اتقوراعا جايعاستىرىپ, كەشكى استى مەكتەپ اسحاناسىنان ىشتىك.

ايتپاقشى بۇل اۋىلدا بىز مادەنيەت ۇيىنىڭ ساحناسىندا ۇيىقتادىق.

WhatsApp Image 2019-07-02 at 12.44.19.jpeg

اۋىلدا اۋىزسۋ ماسەلەسى كۇردەلى. كەشكى ۋاقىتتا عانا بەرىلەدى.

WhatsApp Image 2019-07-02 at 12.44.18 (1).jpeg

ال كۇندىز اۋىل تۇرعىندارى مىناداي بوشكەلەرگە تولتىرعان سۋدى پايدالانادى.

ەكىنشى بىر ماسەلە الكەي مارعۇلان اۋىلىندا بىر-دە بىر مەشىت جوق. 1000-نان استام تۇرعىنى بار اۋىل قاراعاندى-پاۆلودار كۇرەجولىنىڭ بويىندا ورنالاسقان. اۋىل اكىمى جانسەرىك جانىمحاننىڭ ايتۋىنا قاراعاندا الداعى جىلى اۋىزسۋ دا, مەشىت تە بولادى ەكەن.

قۇرمەتتى وقىرمان, 21-29 ماۋسىم ارالىعىندا وتكەن “كيەلى قازاقستان” ەكسپەديتسيياسىنىڭ كۇندەلىك-بارىسىن اتپەن جۇرگەن ۋاقىتتا ينتەرنەت جەلىسىنىڭ جانە بايلانىستىڭ ناشارلىعىنا بايلانىستى نۇر-سۇلتان قالاسىنا جەتىپ العان سوڭ بەرىپ جاتقانىم ۇشىن جۋرناليست رەتىندە كەشىرىم سۇرايمىن. دەگەنمەن, ساپار بارىسىن تولىقتاي وقيتىن بولاسىزدار (اۆتور).

العاشقى كۇننىڭ قورىتىندىسى مەن ەكىنشى كۇننىڭ قىزىقتارىن جانە ۇشىنشى كۇننىڭ تاريحىن وسى جەردەن وقىڭىزدار.

ەرجان جاۋباي, argymaq.kz

دوباۆيت كوممەنتاريي

ۆاش e-mail نە بۋدەت وپۋبليكوۆان. وبيازاتەلنىە پوليا پومەچەنى *

Please Do the Math      
 

موجنو يسپولزوۆات سلەدۋيۋششيە HTML-تەگي ي اتريبۋتى: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>