Түркітектес мемлекеттерге ұлттық спорттың ортақ ережесі керек — Салжанов

8-9 қыркүйек күндері Өзбекстанның Хиуа қаласында Халықаралық этноспорт саммиті өтті.

Аталған жиынға 60-тан астам елдің үкіметтік шенеуніктері, федерация өкілдері мен ғалымдары, сондай-ақ қазіргі уақытта Дүниежүзілік этноспорт конфедерациясына кірген елдердегі арнайы мекемелерден 24 өкіл келді. Сондай-ақ, саммитке Дүниежүзілік этноспорт конфедерациясының президенті Нажмеддин Біләл Ердоған мен Өзбекстан Республикасы Жастар саясаты және спорт министрі Адхам Икрамовтың арнайы шақыртуымен Қазақстан Республикасы Туризм және спорт вице-министрі Сәрсен Құранбек пен Қазақстан Республикасы Ұлттық спорт қауымдастығының президенті Исламбек Салжанов та қатысты.

Саммит аясында Жоғары деңгейдегі Министрлер алқасы, этноспорт фестивалі және Дүниежүзілік этноспорт конфедерациясы мүшелерінің VI кездесуі сияқты маңызды іс-шаралар ұйымдастырылды.

Талқылаулар өткен келелі жиында ұлттық спорт түрлерін дамыту және оның ауқымын кеңейту мәселелері қозғалып, нақты ұсыныстар айтылды.

Жиында арнайы сөз алған Қазақстан Республикасы Ұлттық спорт қауымдастығының президенті Исламбек Салжанов саммитке қатысушыларды келесі жылы Қазақстанда өтетін V Дүниежүзілік Көшпенділер ойындарына шақырып, бірқатар мәселелерді көтерді.

Әлемдік тәжірибеге сүйенетін болсақ, қандай да бір спорт түрін жоғары деңгейге көтеру үшін ең алдымен оны регламенттеп, ережесін жасап, жетілдіру қажет. Онсыз ешқандай спорт тиісті деңгейде дамымайды — деді Исламбек Салжанов.

Сонымен қатар ол түркітілдес мемлекеттер жиналып, ұлттық спорт түрлеріне ортақ ереже бекітіп, нормативтік базасын қалыптастыру арқылы болашақта ұлттық спорттың бір түрін Олимпиада ойындарының бағдарламасына кіргізе алсақ, баршамыздың ортақ жеңісіміз болатынын атап өтті.

Сондықтан да Бүкіләлемдік этноспорт конфедерациясына мүше барлық мемлекет жұдырықтай жұмыла, алға қойған ортақ мақсаттарымызға жетеміз деген үміттемін — деді Қазақстан Республикасы Ұлттық спорт қауымдастығының президенті Исламбек Салжанов.

Айта кетейік, бүгінде Дүниежүзілік этноспорт конфедерациясына 16 мемлекет мүше. Олар: Қазақстан, Қырғызстан, Түркия, Әзірбайжан, Моңғолия, Венгрия, Грузия, Ресей, Аргентина, Жапония, Мексика, Польша, Катар, Румыния, Тунис, Литва.

Argymaq.kz