Астанадағы аламан. «Талхиз» тағы жүлдегер

Астанадағы «Қазанат» ипподромында бәйгеден Қазақстан Республикасының 5-іріктеу туры өтті.

Чемпионатты ҚР Ұлттық спорт Қауымдастығы мен республикалық «Бәйге» федерациясы ұйымдастырды.

Жарысты тамашалауға ҚР Ақпарат және қоғамдық даму министрі Дархан Қыдырәлі, ҚР Ұлттық спорт Қауымдастығының президенті Исламбек Салжанов пен республикалық «Бәйге» федерациясының президенті Қанат Көпбаев арнайы келді.

Аламан доданың ашылуында сөз алған ҚР Ақпарат және қоғамдық даму министрі Дархан Қыдырәлі соңғы уақытта елімізде ұлттық спорт түрлерінің танымалдығы артқанын айтып, жарыс жеңімпаздарын құттықтады.

Біз желмен жарысқан, жылқының жалында өскен жұрттың жұрнағымыз. Сондықтан жылқы десе, бәйге десе бәріміздің делебеміз қозып отырады. Жылқы бізге қанат байлайды, ат – біздің рухымыз. Сол рухқа қызмет жасап жүрген ҚР Ұлттық спорт қауымдастығы мен республикалық «Бәйге» федерациясының басшыларына өз ризашылығымды білдіремін! Қазақтың рухы әрдайым биік болсын! Бүгінгі бәйгенің жеңімпаздарын шын жүректен құттықтаймын – деді Дархан Қуандықұлы.

Салтанатты шарада сөз алған ҚР Ұлттық спорт Қауымдастығының президенті Исламбек Салжанов жарыстың маңыздылығын тілге тиек етті.

Ұлттық спорттың артында ұлттың рухы, ұлттың намысы, тарихы, мәдениеті мен дәстүрі тұр. Мемлекет басшысы Қасым-Жомарт Тоқаевтың тікелей қолдауымен соңғы жылдары елімізде ұлттық спорт түрлері қарқынды дамып келеді. Бүгінгі біздің жарысымызды тамашалауға арнайы келген ҚР Ақпарат және қоғамдық даму министрі Дархан Қуандықұлына алғыс айтамын. Баршаңызға белгілі, қазіргі таңда біз еліміздің барлық өңірінде бәйгеден жарыстарды ұйымдастырып жүрміз. Осынау жауапты әрі игі жұмыстардың басында болып, барлық жарыстың жоғары деңгейде өтуіне ат салысып жүрген республикалық «Бәйге» федерациясының президенті Қанат Шоқанұлына да ризашылығымды білдіргім келеді! – деді ол.

Келесі жылы елімізде бесінші Дүниежүзілік көшпенділер ойындары өтеді. Бұл біз үшін де, еліміз үшін де – маңызды жоба.

Бұл шара барысында жарыстардың көптеп өтуі ұлттық спортымыздың дамуына зор пайдасын тигізеді. Одан бөлек те, алдағы уақытта біз ірі-ірі додаларды ұйымдастыратын боламыз. Осылайша ұлттық спортымызды болашақта әлемге танытсақ дейміз – деді Исламбек Төлеубайұлы.

Республикалық «Бәйге» федерациясының президенті Қанат Көпбаев соңғы уақытта бәйге спортынан өтетін жарыстарға келетін көрермендер саны артып жатқанын қуана жеткізді.

Біз еліміздің өңірлерінде бәйге спортынан жарыстарды тұрақты өткізіп келеміз. Мақсатымыз – ұлттық спортымыз бәйгенің танымдылығын арттырып, мәртебесін өсіру. Бір қуанарлығы, күн санап бәйгеге қызығушылық танытып жатқан көрермендер қарасы көбеюде. Бұл біздің дұрыс бағытта жұмыс істеп жатқандығымыздың көрсеткіші – деді Қанат Шоқанұлы.

Турнирге еліміздің бірнеше өңірінен 80 жуық жүйрік қатысып, «Құнан бәйге», «Топ бәйге», «Жорға жарыс», «Аламан бәйге» бойынша сайысқа түсті. Жарыстың жүлде қоры – 23 500 000 теңге.

Жарыс нәтижесі:

«Құнан бәйге» (10 шақырым):

1-орын – Алдияр Уайсхан, «Лазер»;

2-орын – Асланбек Абдықал, «Қарақат»;

3-орын – Нұрмұқаш Ділнұр, «Мамлюк».

«Топ бәйге» (16 шақырым):

1-орын – Әмір Серік, «Мой мир»;

2-орын – Асланбек Абдықал, «Абырай»;

3-орын – Бекзат Ділдәхан, «Сакура».

«Жорға жарысы» (9 шақырым):

1-орын – Жан Қоқанбае,в «Салкүрең»;

2-орын – Әлия Асқарова, «Месяц май»;

3-орын – Шуақ Жайлаубек, «Жұлдыз».

«Аламан бәйге» (23 шақырым):

1-орын – Бекзат Ділдәхан, «Талхиз»;

2-орын – Арнат Мұратхан, «Семсер»;

3-орын – Арнұр Саматұлы, «Самал».

Айта кетейік, жарыс ұйымдастырушылары 4-ші және 5-орын алған шабандоздарды да ақшалай сыйлықпен марапаттады.

Одан бөлек, жарыс барысында көрермендер ұлттық киім байқауын тамашалады. Бұл сайыстың жеңімпаздарына ұйымдастырушылар жалпы көлемі 1 миллион теңге сыйақы табыстады.

Argymaq.kz