جاباعى ۇيرەتۋدەن ەستافەتالىق بايقاۋ وتتى (فوتو)

Zhabagy11

قر پرەزيدەنتى ن. ا. نازارباەۆ وزىنىڭ «ۇلى دالانىڭ جەتى قىرى» اتتى ماقالاسىندا:  «اتقا مىنۋ مادەنيەتى مەن جىلقى شارۋاشىلىعى جەر جۇزىنە ۇلى دالادان تاراعانى تاريحتان بەلگىلى. ەلىمىزدىڭ سولتۇستىك وڭىرىندەگى “بوتاي” قونىسىندا جۇرگىزىلگەن قازبا جۇمىستارى جىلقىنىڭ تۇڭعىش رەت قازاقستان اۋماعىندا قولعا ۇيرەتىلگەنىن دالەلدەدى», – دەپ ايتىپ وتكەنىن بىلەسىزدەر. ال, «بوتاي» قونىسىنىڭ كوكشەتاۋ ايماعىنان الىس ەمەس ەكەنىن ەسكەرسەك, جىلقى بالاسى وسى بىزدىڭ وڭىردە العاش اۋىزدىقتالعان دەپ ايتۋعا تولىق قاقىمىز بار!

سال-سەرىلەردىڭ التىن بەسىگى – كوكشەتاۋ وزىنىڭ بىرجان سال, اقان سەرى, ۇكىلى ىبىرايىمەن ماقتانسا, سول اقان سەرىنىڭ اۋزىمەن قۇس تىستەگەن جۇيرىگى -  قۇلاگەردىڭ دە قاسيەتتى كوكشە توپىراعىنان شىعۋى كەزدەيسوق ەمەس.
وكىنىشكە وراي قازىرگى جاھاندانۋ زامانىندا,  كومپيۋتەر مەن گادجەتتەرگە تەلمىرىپ, ينتەرنەتكە بايلانعان قازاق بالاسىن ات قۇلاعىندا وينايدى دەپ ايتا المايمىز. بالا تۇگىلى سوقتالداي جىگىتتەرىمىزدىڭ وزى بوستاقىم بوپ بارا جاتقانى “كوشپەندىنىڭ ۇرپاعى” دەگەن اتىمىزعا سىن, ارينە!

Zhabagy

سوندىقتان دا اۋىلدىڭ قارا دومالاق بالالارىن اتقا مىنىپ كورمەگەن قالا بالالارىنا ۇلگى-ونەگە ەتۋ, سونداي-اق وسى اۋىل بالالارىنىڭ ارقاسىندا اسفالتتا وسكەن قالا بالالارىنىڭ اتقا مىنۋگە دەگەن قىزىعۋشىلىعىن وياتىپ, بويلارىنا پاتريوتتىق سەزىم مەن جاۋىنگەرلىك رۋح دارىتۋ ماقساتىندا  اقمولا وبلىستىق ىشكى ساياسات باسقارماسىنىڭ قولداۋىمەن, «رۋحاني جاڭعىرۋ» باعدارلاماسىنىڭ وڭىرلىك جوبالىق كەڭسەسىنىڭ ۇيىمداستىرۋىمەن زەرەندى اۋدانىنىڭ ساكەن سەيفۋللين اۋىلىندا «تاي – اتقا, ات مۇراتقا جەتكىزەر» اتتى جاباعى ۇيرەتۋدەن ەستافەتالىق بايقاۋ وتتى. جاباعى ۇيرەتۋ  بايقاۋىنا قاتتىسساق دەپ كورشى بىرلەستىك اۋىلىنان دا دەنە تاربيەسى پانىنىڭ مۇعالىمى بۇركىتوۆ دۋلات ماراتۇلى باستاعان بىر توپ جاس ورەندەردىڭ ارنايى كەلگەنى كوڭىلىمىزدەگى قۋانىشتى ەسەلەي تۇستى.

Zhabagy1

سونىمەن, بايقاۋ ەرەجەسىنە سايكەس 5-8 سىنىپ ارالىعىنداعى وننان استام وقۋشى وزارا باق سىناساتىن بولدى.

بايقاۋدىڭ سالتاناتتى اشىلۋىندا اۋىل ۇلكەنى ولجاباي ۋاليەۆ اقساقال باتا بەرىپ, ودان كەيىن ساكەن سەيفۋللين اۋىلدىق وكرۋگىنىڭ اكىمى اقىلبەك داۋلەتبەكۇلى بەكماعامبەتوۆ جانە قازىلار القاسىنىڭ توراعاسى, سول اۋىلدىق وكرۋگتىڭ تالاي جىلدان بەرى جىلقىشىسى بوپ كەلە جاتقان اباي جۇسىبالين مەن كوكشەتاۋ قالاسىنان ارنايى بارعان بالۋان شولاق اتىنداعى ۇلتتىق سپورت مەكتەبىنىڭ جاتتىقتىرۋشىلارى ايبولات ەستاي مەن جاندوس قالىمتاەۆتار سوز الىپ اتالمىش شارانىڭ مان-ماڭىزىنا ەرەكشە توقتالىپ وتتى.

Zhabagy2

قوش, سونىمەن بايقاۋ دا باستالدى دەرسىڭ! جىلقىدان ادەيى اكەلىنگەن ۇزىن سانى ون بەس جاباعى دا “قايسىڭ مىنسەڭ دە جىقپاي قويماسپىن” دەگەندەي تاناۋىنان بۋى بۇرقىراپ, داۋىستارى كۇمىس قوڭىراۋداي بولىپ ادەمى كىسىنەيدى. ونى بىر بولەك, بەسەۋى بىر بولەك. ياعني بەس جاباعى – فينالعا شىققانداردىڭ ەنشىسىندە.

Zhabagy3

بۇرىن جۇگەن-قۇرىق تيمەگەن شۋ اساۋلاردىڭ شوقتىعىندا تۇرىمتايداي بولىپ وتىرعان تاقىمى تاستاي, بىلەگى قۇرىشتاي, جىگەرى قىلىشتاي بالاقايلاردى كورىپ تاڭداي قاقپاۋ, سۇيسىنبەۋ مۇمكىن ەمەس ەدى. تاماشالاۋعا كەلگەن حالايىقتىڭ ايعايى مەن ىسقىرىعى قۇلاق تۇندىردى. اسىرەسە اجەلەر مەن انالاردىڭ قۋانىشى ەرەكشە! وسى جەردە “بالاسى بايگەگە شاپسا, اناسى تاقىمىن قىسادى” دەپ دانا قازاعىم قالاي دال تاۋىپ ايتقان, ا!” دەپ ەرىكسىز باس شايقادىق. بىر-بىرىنە “قايىرلى بولسىن!” ايتىسقان اجەلەر دە مارە-سارە, بىز دە مارە-سارە!

Zhabagy4

اسپانعا قارعىپ, جەرگە تۇسكەن, باسىن ەكى اياقتىڭ ورتاسىنا تىعىپ الىپ تۋلاعان شاقار جاباعىدان قۇلاماي قالعاندارى دا, تۋلاسىنا شىداس بەرمەي توپ ەتىپ جىعىلىپ, ۇستى-باسىنىڭ قارىن قاعىپ-سوعا سالا قايتا اساۋدىڭ جالىنا جابىسا تىرمىسىپ جاتقاندار دا بولدى. “بۇگىن جاباعىدان جىعىلساڭ دا, تالابىڭنان جىعىلماعايسىڭ, جاس ورەن!” دەپ ىشتەي ارقايسىنا دا تىلەكشى بولدىق.

Zhabagy5

باس-اياعى بىرنەشە ساعاتقا سوزىلعان بايقاۋ قورىتىندىسىن بىلۋگە اسىققان حالىق تايلى-تاياعىمەن اۋىلدىڭ كلۋبىنا جيىلدى. كوكشەتاۋ قالاسىنداعى بىرجان سال اتىنداعى مۋزىكا كولەدجىنىڭ ونەرپاز ستۋدەنتتەرى مەن تانىمال انشى اسلان مۇحامەديياروۆتىڭ سالعان انىنەن اسەرلەنگەن ەلدىڭ قوشەمەتى اۋىلدىڭ شاعىن مادەنيەت وشاعىن تەڭسەلتىپ جىبەرگەندەي ەدى. ايتىس اقىندارى قۋانىش وسپان مەن مۇحامەد قوڭقاەۆتىڭ ايتىسى دا كورەرمەندى شات-شادىمان كوڭىل كۇيگە بولەدى.

Zhabagy6

كونتسەرتتىك باعدارلامادان سوڭ بايقاۋ ۇيىمداستىرۋشىلارى اتىنان “رۋحاني جاڭعىرۋ” باعدارلاماسىنىڭ  وڭىرلىك جوبالىق كەڭسەسىنىڭ باسشىسى, اقىن مەرگەن كوشەربايۇلى سوز سويلەپ, وسى بايقاۋدى ۇيىمداستىرۋعا اتسالىسقان بارشا اۋىل ازاماتتارىنا العىس, ىقىلاسىن بىلدىردى!

Zhabagy7

قازىلار القاسىنىڭ شەشىمى بويىنشا بوتاقارا ماقسات پەن قۋانتاي نۇرمۇحامەد – ارنايى جۇلدەگە, ايدارحان ايان – 3 ورىن, شايجانوۆ تيمۋر – 2 ورىن, تەمىركە بەكزات – 1 ورىندى جەڭىپ الىپ, بارى دە ارنايى ديپلوم جانە اقشالاي سىيلىقتارمەن ماراپاتتالدى. ال, “بايقاۋدىڭ ەڭ كىشكەنتاي ۇمىتكەرى”  دەگەن ارنايى نوميناتسييا -  شورمان مۇحامەدماديگە بۇيىردى جانە  ديپلوم مەن سىياقىسى دا, البەتتە, قوسا تابىستالدى.

Zhabagy8

جوعارىدا “ەستافەتالىق بايقاۋ” دەپ ايتىپ وتكەنىمىزدەي, بىرجان سال اۋدانىنان ارنايى كەلگەن مەدەت داۋلەتحانوۆ ەسىمدى ازامات ەستافەتانى قابىل الىپ, كەلەسى بايقاۋ ساۋلە اۋىلىندا وتەتىن بولىپ كەلىسىلدى.

Zhabagy9

نامىسى – ور, رۋحى – اسقاق, تالابى تاۋداي وسى بالاقايلار تۇرعاندا قازاقتىڭ كوك بايراعى بيىكتەن جەلبىرەي بەرمەك!  وسى بالالار ەرتەڭگى كۇنى قازاق ەلىنىڭ ماڭگىلىك ەل بولۋى ۇشىن ات ۇستىندە جۇرىپ, بەل شەشپەي قىزمەت ەتەدى دەگەنگە سەنىمىمىز كامىل!

Sergazy K.سەرعازى قايىربولدى,
اقمولا وبلىسى “رۋحاني جاڭعىرۋ” باعدارلاماسى وڭىرلىك جوبالىق كەڭسەسىنىڭ مەنەدجەرى.

argymaq.kz

دوباۆيت كوممەنتاريي

ۆاش e-mail نە بۋدەت وپۋبليكوۆان. وبيازاتەلنىە پوليا پومەچەنى *

Please Do the Math      
 

موجنو يسپولزوۆات سلەدۋيۋششيە HTML-تەگي ي اتريبۋتى: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>