Home›Басты ақпарат›Миллион долларға сатылмаған сәйгүлік

Миллион долларға сатылмаған сәйгүлік

25.01.2024

593

Бұған дейін Дубайдағы әлемдік додада Қазақстанның сәйгүліктері жүлделі орындарға ілінген емес.

Алайда тумысынан тұлпар болған Кабирхан деген ат отандастарымыздың мерейін үстем етіп, мейманасын тасытты. Аттың иесінің айтуынша, сәйгүлікті сат деп қолқа салғандар көп болған.

Тұлпардың иесі Тілек Мұханбетқалиев Ұлттық спорт қауымдастығының ютуб арнасына берген эксклюзивті сұхбаты барысында біршама тың дерекпен бөлісті.

Айтуынша, Кабирханның тұрқын көрген ат сыншылары оны 100 жылда бір туатын тұлпар деп бағалаған. 9 рет бәйгеге шауып, соның сегізінде бірінші, тек біреуінен екінші келген Кабирханға ат ұстаушылардың назары бірден ауған.

Кабирханды сат дегендер көп болды. Ресейден де сұрады. Бірақ, келісе алмадық. Қанша ұсынғандары құпия болып қалсын. Ең көбі 1 миллион доллар берді, сатпадым,-дейді ат иесі.

Сондай-ақ, ол жарыстарға қатысқан сайын Кабирханның рейтингі өсіп келе жатқанын жеткізді.

Біраз жүлде ұтты. Өз-өзін ақтап қойған. Ресейде 5,5 миллион рубль ұтты, теңгеге шақсақ 27 миллион теңге. Ал Дубайда 126 мың дирхем жеңді. Енді оны курспен есептесек 35 мың доллар, — деді Тілек Мұханбетқалиев.

Айта кетейік, бүгіннен бастап Ұлттық спорт Youtube арнасын іске қосылды. Арнада эксклюзивті сұхбаттар, Ұлттық спорт қауымдастығына кіретін федерациялардың жаңалықтары, спортшыларды даярлау барысы сияқты және т.б. көптеген қызықты контент жарияланбақ. Оның алғашқы шығарылымы БАӘ, Дубайда өткен жарыста бірінші орынға ие болған, көптеген жарыста алдына қара салмаған Кабирхан атты жылқының иесі Тілек Мұханбетқалиевпен эксклюзивті сұхбатқа арналды.

Сұхбаттың толық нұсқасын Ұлттық спорт қауымдастығының ютуб-арнасынан көре аласыздар.