Ұлттық спорт жеңімпаздары спорттық-сауықтыру кешенін ұтып алды

Семей қаласында Абай облысы әкімінің жүлдесіне арналған ауыл спорты ойындары өз мәресіне жетті.

Өңірдің 10 ауданынан келген мыңға жуық спортшы үш күн бойы ұлттық спорт түрлері мен командалық ойындар бойынша бақ сынады.

Үстел теннисі, тоғызқұмалақ, Президенттік көпсайыс, қазақ күресі, волейбол, шағын футбол, асық ату, гір көтеру, қол күресі, көкпар, аударыспақ, теңге ілу, дәстүрлі садақ ату, жекпе жек, аламан бәйге, топ бәйге сынды 16 спорт түрінен жарыс өтті.

Спорттық доданың салтанатты жабылу рәсіміне облыс әкімі Берік Уәли қатысып, жеңімпаз командаларды марапаттады.

Бүгін Абай облысы әкімінің жүлдесіне арналған жарыс өз мәресіне жетті. Біз бұқаралық спортты алдағы уақытта да қолдай береміз. Мемлекет басшысы Қасым-Жомарт Кемелұлы Тоқаевтың өзі халықтың бұқаралық спортпен көбірек айналысуына үндеп, үнемі осы бағытты дамыту керектігін айтып келеді. Биыл алғаш рет ауылдан шыққан азаматтарды қолдап, үлкен спорттық шараның шымылдығын түрдік, тұсауын кестік. Алдағы жылы да жалғастырамыз. Бұл жай ғана жарыс емес, сондықтан сыйлығын да қомақты қылып қойдық. Командалық есепте бірінші орын алған аудан спорттық-сауықтыру кешенін ұтып алады. Екінші орынға спортшыларды тасымалдайтын автобусты, үшінші орынға футбол алаңын қойып отырмыз. Бұл бұрын-соңды болмаған жағдай – деді аймақ басшысы.

Сайыс қорытындысы бойынша үшінші орынды – Ақсуат ауданы, екінші орынды – Абай ауданы, бірінші орынды – Аягөз ауданы иеленді.

Облыс әкімі жүлде алған аудандарға футбол алаңы, автобус пен спорттық-сауықтыру кешенінің сертификатын салтанатты түрде табыс етті.

Ауыл спорты ойындарында үздік шыққан командалар биыл 12-21 қыркүйек аралығында Алматы облысында өтетін VIII ауыл спорты ойындарына жолдама алды.

Argymaq.kz