Жігіт болсаң, теңге іл де, асау үйрет!

Тамыз айының 30-күні Астана қаласындағы «Қазанат» атшабарында «Самұрық – Қазына» Ұлттық әл-ауқат қорының демеушілігімен, ҚР Ұлттық спорт түрлері қауымдастығының ұйымдастыруымен қазақтың ұлттық ойыны Теңге ілуден І Ашық Азия чемпионаты өтеді. Аталмыш ауқымды шараға Қытай, Моңғолия, Өзбекстан, Тәжікстан, Ресей, Қырғызстан қатарлы оншақты республика спортшылары бақ сынайды деп күтілуде.
Сондай-ақ, теңге ілу сайысымен қатар Асау үйретуден І Республикалық турнирі өз байрағын көтермекші. Жүген-құрық тимеген шу асауды ер-тоқым салмай, жүген-құрықсыз жайдақ мініп, бастықтыру жарысы көрермен қауымның қызығушылығын тудырады деген сенім бар. Бұл жарыс еліміздің ұлттық спорт тарихында тұңғыш рет ұйымдастырылып отыр. Асау үйретуге әзірге әр облыстан бір-бір үміткер қатысады деп жоспарлануда.
Бұл туралы ҚР Ұлттық спорт түрлері қауымдастығының баспасөз хатшысы Бекен Қайратұлы өзінің фейзбуктағы парақшасында жариялады.