الپامىس باتىردىڭ بايشۇباردى تاڭداۋى

Alpamys

… بايبورىنىڭ بىر قۇلى بار ەدى. ونىڭ اتى قۇلتاي بولىپ, توقسان قۇلدىڭ باسى ەدى. بىر كۇنى جىلقىنىڭ باسىندا جاتىر ەدى. الپامىستىڭ اتاسى مەنەن اناسى جالعىز ۇلىمىزدان ايرىلىپ قالارمىز دەپ كەلىنىنىڭ كەتكەنىن ايتقان جوق ەدى. بىر كۇنى الپامىس تىللادان ىستەلگەن ەرىن يىنىنە سالىپ, كوپ جىلقىنىڭ باسىندا جاتقان قۇلتاي باباسىنىڭ قاسىنا كەلدى.

الپامىس جەتى جاسىنا كەلگەندە جىلقىلارىنىڭ ىشىندە ادەيى الپامىسقا ارناپ جۇرگەن دۇلدىل قۇلىنى جەتى جاسىنا شىعىپ ەدى, ەشبىرىندە مىنگەن ەمەس ەدى, ونىڭ اتىن بايشۇبار دەۋشى ەدى. بۇل بايشۇبار: «مەنى بىر ەر مىنەر, قانداي باتىر مەنى مىنسە قۇيرىعىمنان تارتىپ توقتاتقان كىسى مىنەر» دەپ ەدى. بۇل ويى وزىنە ماقۇل كورىنىپ جۇرۋشى ەدى.

الپامىس باباسىنا كەلىپ: «قالماققا كەتكەن كەلىنىڭىزدىڭ ىزىنەن كەتەمىن, ماعان بىر ات بەر», – دەيدى. سوندا باباسى: «جاقسى پەيىلىممەن ساعان ەنشىڭە ايتىپ جۇرگەن بىر اتىم بار ەدى. كوپ جىلقىنى ۇستىڭنەن توعىتىپ ايدايىن. سەن بىر تاستىڭ تاساسىندا جات, سەنىڭ قايراتتى ەر جىگىت ەكەنىڭدى بىلەيىن, وزىڭە لايىقتاپ ايتقان قۇلىندى ۇستاپ ال. بالام, سەنىڭ جاقسى ەكەنىڭدى كورەيىن, ەنشىڭدى تانىپ ۇستاساڭ, قولىمنان ەرتتەپ بەرەيىن» – دەيدى.

ەندى جىلقىنى الپامىستىڭ ۇستىنەن توعىتىپ ايدادى. الپامىس جىلقىنىڭ بارىنە قاراپ جاتىر. جىلقىلار الپامىستىڭ ۇستىنەن وتىپ جاتىر. وزىنىڭ اتاسى بايبورى بايدىڭ كوپ جىلقىسىنىڭ ىشىنەن تولىپ جاتقان بەدەۋدەن بىرەۋىن دە كوڭىلى جاراتپادى. جىلقىنىڭ بىر قارا كورىنىم سوڭىندا بىر بايشۇبار ات كورىندى. جالى قۇلاعىنان اسقان, تورت اياعىن تەڭ باسقان, قۇيرىعى بىر قولتىق سەكسەۋىلدىڭ شىرپىسىنداي, جال كەكىلى جىبەكتەي. الپامىس جاتقان اق تاستىڭ ۇستىنەن جورتىپ وتە بەردى.

الپامىس كورە سالىپ, بىلەگىنە كۇشىن جيدى, سەكىرىپ ورنىنان تۇردى. الپامىس سۇلتان ناق ون تورت جاسىندا اتتىڭ قۇيرىعىنا جولبارىستاي قول سالدى. الپامىس دەگەن الىپ ەدى, جانۋار بايشۇبار نار سيياقتى تىزەسىن بۇكتى, قانجىعالاپ قۇلاعىن تىكتى ۇش مارتەبە زور سالدى, الپامىس جىبەرمەدى. الپامىس الىپ زورلىعىن بىلدىردى. بايشۇبار اتتىڭ وزىنىڭ ۋادەسى بار ەدى: «مەنى قۇيرىعىمنان تارتىپ توقتاتقان ەر مىنەر» دەگەن. سول ۋادەسىنە كەلدى, «ماعان يە بولۋعا جارايتىن ادام ەكەن» دەپ تۇرىپ قالدى.

الپامىس قۇلتاي باباسىنىڭ قاسىنا مىنىپ كەلدى. سوندا قۇلتاي باباسى:

- قۇتتى بولسىن مىنگەن اتىڭ,

سەن, سەن – مەنىڭ ماداتىم.

قۇتتى بولسىن شۇبارىڭ,

موينىڭا تاققان تۇمارىڭ,

شاپقاندا تارقار قۇمارىڭ.

ار جەرلەردە كۇنىڭە جارار,

شىراعىم, مىنگەن شۇبارىڭ.

وسى سوزدەردى ايتىپ بولعان سوڭ الپامىس بايشۇبارعا تىللادان ەر سالدى, قوس تارتپاسىن شالدى.

بولاتتان دابىل توڭكەرىپ,

ارتىنا قالقان بوكتەرىپ.

قاراعاي نايزا وڭگەرىپ,

استىنداعى شۇبارىن,

وز باسىمەن تەڭ كورىپ.

قۇلتاي اتتى بابادان,

بەدەۋدىڭ مىندى بەلىنە.

ساپار قىلدى مايداندا,

تايشا قالماق ەلىنە.

ويلى-قىرلى جولمەنەن,

بۇل جاپاندا شولمەنەن.

اقشا جۇزىن سولدىرىپ,

قامقا كوڭلىن تولتىرىپ,

بارشىنجاننىڭ جولىندا

مىنگەن شۇبار بولدىرىپ…

“الپامىس باتىر” جىرىنان ۇزىندى

دوباۆيت كوممەنتاريي

ۆاش e-mail نە بۋدەت وپۋبليكوۆان. وبيازاتەلنىە پوليا پومەچەنى *

Please Do the Math      
 

موجنو يسپولزوۆات سلەدۋيۋششيە HTML-تەگي ي اتريبۋتى: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>