اتتى تۋر. اقىرعى كۇن

Atty tur4

28 ماۋسىم, جۇما. بۇگىن جاڭاتىلەك اۋىلىنان جاسىباي كولىنە دەيىنگى 45 شاقىرىمدى جۇرىپ وتۋىمىز كەرەك. جانە بۇگىن ەكسپەديتسييانىڭ سوڭعى كۇنى.

جاڭاتىلەكتەن شىققاندا جول بويىنداعى ەگىندىبۇلاق اۋىلىن سوعىپ, سول اۋىلدان باياناۋىل تاۋلارىنىڭ جولىن جاقسى بىلەتىن جولباسشى الماق بولدىق. سەبەبى بىز ناۆيگاتور ارقىلى جاڭاتىلەك-جاسىباي دەپ تۋرا باعدار بەلگىلەپ, سول ارقىلى جۇرسەك جاسىباي كولىن كومكەرىپ جاتقان باياناۋىل تاۋلارىنىڭ قييان جارتاستارىنا, باتپاقتى بۇلاقتارىنا تىرەلىپ, ۋاقىتىمىز بەن ات كۇشىن جوعالتاتىنىمىز انىق ەدى.

IMG_2165.jpg

وسى وڭىردى جاقسى بىلەتىن, باياناۋىل ۇلتتىق تابيعي پاركىندە جۇمىس ىستەيتىن باقىتجان جۇنىسوۆ ەگىندىبۇلاقپەن حابارلاسىپ, بىزگە جولباسشىلىققا بىر جىگىتتىڭ ەرەتىنىن ايتتى.

IMG_2166.jpg

جاڭاتىلەكتەن ات باسىن سولتۇستىك شىعىسقا قاراي بۇردىق. الدىمىزدان ايگىلى تۇزكول كولى كورىنەدى.

«بۇل كولدەن بىر كەزدە حالىق جاپپاي قۇرت تەرگەن. ول كەزدە كولدىڭ سۋى اششى بولعان ەكەن. قۇرتىن تەرىپ, شەتەلگە ساتىپ, پايدا تاپقاندار دا بولىپتى. قۇرتىنان ارىلعان كەزدە كولدىڭ سۋى تۇششى بولىپ كەتكەن. قازىرگى ۋاقىتتا كول سۋىن اۋىزسۋى رەتىندە پايدالانۋعا بولادى» – دەگەن قاۋاسەت بار اۋىل ادامدارىنىڭ اراسىندا.

سۋىنان دام تاتىپ كورگەن جوقپىز, دەگەنمەن سۋرەتكە تۇسىرىپ الدىق. بالكىم الداعى ۋاقىتتا بىر ماقالاعا جۇك بولار.

IMG_2157.jpg

كول جاعالاي شۇبىرعان سالت اتتىلار ەگىندىبۇلاققا بارمايتىن بولدى. كەرىسىنشە بىزگە جول كورسەتەتىن بايانبەك ەسىمدى ازاماتتى باياناۋىل تاۋىنىڭ بىر سىلەمى وگەلەڭ ەتەگىندە كۇتىپ الاتىن بولدىق.

IMG_2178.jpg

بايانبەك بىزدى وگەلەڭنىڭ بوكتەرىندە قۋىپ جەتكەندە كۇن تۇسكە تاقاپ قالعان ەدى. باياننىڭ كوز سۇرىندىرەر سۇلۋ كەلبەتىنە تانتى بولىپ, ساپارىمىزدى جالعاستىرا بەردىك.

جولباسشى العانىمىز وتە جاقسى بولىپتى. «بىلمەيتىن جەردىڭ وي-شۇڭقىرى كوپ» دەگەندەي, وگەلەڭ ولكەسىندە وتكەل بەرمەس كەدەرگىلەر كوپ ەكەن.

IMG_2220.jpg

ايتپاقشى, كەشەگى وسپادارسىزدىعىنان كەيىن دۋگلاس راسمەن شالقاسقاعا مىندى. بىراق بۇل ارەكەتىنە ول جول سوڭىنا تامان وكىندى.

IMG_2252.jpg

قازاقتا, «وتكەل اۋزىندا ات اۋىستىرما» دەگەن سوز بار. دەگەنمەن, جاسۇلان انشىنىڭ قوڭىرى وگەلەڭنىڭ ورىنە كەلگەندە سىر بەردى. كۇيى تايىپ, ۇيقى كورمەي جۇرگەن قوڭىر ات جۇرە الماي قالدى. سودان جاسۇلان جەتەكتەگى اقجال سارىنى مىندى.

IMG_2286.jpg

جول بارعان سايىن قيىنداپ, قيىنداعان سايىن باياننىڭ تابيعاتى تامساندىرۋمەن كەلەدى. قامشىلار جاق قاپتالىمىزدا ايگىلى «قوڭىر اۋليە» ۇڭگىرى قالىپ بارادى. بىز ول جاققا ات باسىن بۇرعان جوقپىز. جاسىبايعا تىكە تارتتىق.

IMG_2271.jpg

جارتاستى جارىپ شىققان شىنار, سىلدىراعان بۇلاق, يت تۇمسىعى وتپەس بىتەۋ, قولدان قاشاپ, قولادان قۇيعانداي قاتپار-قاتپار جارتاستار. وسىدان مىڭ جىل, بالكىم جەر جارالعالى وسىلاي تۇرعان بولار. وسىندايدا “ادامدار كەلەدى-كەتەدى, قارا جەر ماڭگىلىك” دەگەن سوزدىڭ شىنايىلىعىنا كوزىڭىز جەتەدى.

WhatsApp Image 2019-07-04 at 10.17.50.jpeg

جاسىباي كولىنە 3-4 شاقىرىم قالعاندا ورامان شەتىندەگى قيراعان قۇرىلىستىڭ جۇرتىنا تاپ بولدىق. جولباسشىمىز بايانبەكتىڭ ايتۋىنا قاراعاندا بۇل جەردە وسىدان ونشاقتى جىل بۇرىن امەريكالىقتاردىڭ ارنايى زەرتحاناسى بولعان ەكەن. وسى جەردە باياناۋىلدىڭ بارلىق تاۋ-تاس, ورمان-توعاي, وزەن-كول, قۇم-توپىراق, شوپ-شالامىن تۇگەل زەرتتەگەن. وز مىندەتتەرىن ورىنداپ بولعان جاتجەرلىكتەر كەتكەندە ارتىندا دايىن جۇمىس ورنى دا قالىپتى. سۋى, جارىعى, بارلىعى تارتىلعان. وسىنداي دايىن دۇنيەنى پايدالانۋدىڭ ورنىنا, بىزدىڭ حالىق ونى جەرمەن-جەكسەڭ ەتىپ, قۇرتىپ, قيراتىپ تاستاپتى.

WhatsApp Image 2019-07-03 at 08.50.40 (1).jpeg

جاسىبايدىڭ جاعاسىنا جەتكەندە بىزدى باياناۋىل وڭىرىنىڭ جاستارى انمەن, جىرمەن, دۋمانداتىپ قارسى الدى. پاۆلوداردىڭ گاۋھار تۇيمەسىندەي جارقىلداعان جاسىبايدىڭ جاعاسى دەمالۋشىلارعا تولى ەكەن. بىز دە بارىپ سولاردىڭ قاتارىندا ات بەلىن بوساتتىق.

IMG_2291.jpg

8 كۇنگە سوزىلعان ەلوردا-جاسىباي «كيەلى قازاقستان» ەكسپەديتسيياسى وز سوڭىنا جەتتى. قازاقستان رەسپۋبليكاسى مادەنيەت جانە سپورت مينيسترلىگىنىڭ قولداۋىمەن وتكەن شارانى «Kazakh Tourism» ۇك» اق ۇيىمداستىرىپ, «QazaqGeography» رقب باعداردى بەلگىلەدى.

IMG_2265.jpg

ايتپاقشا, سوز باسىندا ايتقان دۋگلاستىڭ شالقاسقامەن بولعان “شالكەم-شالىسىن” ايتا كەتەيىن. شالقاسقا بەلى سولقىلداعان, جۇرىسى جايسىزداۋ جىلقى. ۇزاق جولدا كەشەگى ايىبىن جۋعىسى كەلگەن دۋكەڭ جەزدەي شالقاسقاعا ەر سالعانىنا ەپتەپ رەنجۋلى ەكەنىن قاباعىنان بايقادىق. ويتكەنى تاۋ اراسىنداعى جولدا ات باسىمەن الىسىپ كەلدى. تىپتى بىر رەت تىزگىندى قاتتى تارتىپ قالىپ, ات جەلكەسى ماڭدايىن سوققان ساتى دە بولدى.

ەلباسىنىڭ «ۇلى دالانىڭ جەتى قىرى» ماقالاسىندا ارنايى توقتالعان «اتقا مىنۋ مادەنيەتىن» دامىتىپ, رۋحاني جاڭعىرۋ باعدارلاماسىندا اتاپ كورسەتكەندەي تۋعان جەردى دارىپتەپ, قاسيەتتى قازاقستان كارتاسىن جاساۋدا ايتارلىقتاي ورنى بار بۇل ساپار الداعى جىلدا دا جالعاسىن تابادى دەگەن سەنىم بار.

ايتپاقشى, وسى ەكسپەديتسييانى باسقارىپ, ۇيىمداستىرۋشىلىقتى وز قولىنا العان نۇرجان العاشەۆتىڭ ايتۋىنشا 1 شىلدە كۇنى «كيەلى قازاقستان» ەكسپەديتسيياسىنىڭ ەكىنشى كەزەڭى الماتى وبلىسىندا باستالادى.

قۇرمەتتى وقىرمان, 21-29 ماۋسىم ارالىعىندا وتكەن “كيەلى قازاقستان” ەكسپەديتسيياسىنىڭ كۇندەلىك-بارىسىن اتپەن جۇرگەن ۋاقىتتا ينتەرنەت جەلىسىنىڭ جانە بايلانىستىڭ ناشارلىعىنا بايلانىستى نۇر-سۇلتان قالاسىنا جەتىپ العان سوڭ بەرىپ جاتقانىم ۇشىن جۋرناليست رەتىندە كەشىرىم سۇرايمىن. دەگەنمەن, ساپار بارىسىن تولىقتاي وقيتىن بولاسىزدار (اۆتور).

 العاشقى كۇننىڭ قورىتىندىسى مەن ەكىنشى كۇننىڭ قىزىقتارىن جانە ۇشىنشى كۇن مەن تورتىنشى كۇننىڭبەسىنشى كۇننىڭالتىنشى كۇننىڭ, سونىمەن قاتار جەتىنشى كۇننىڭ جولجازباسىن وسى جەردەن وقىڭىزدار.

ەرجان جاۋباي, argymaq.kz

دوباۆيت كوممەنتاريي

ۆاش e-mail نە بۋدەت وپۋبليكوۆان. وبيازاتەلنىە پوليا پومەچەنى *

Please Do the Math      
 

موجنو يسپولزوۆات سلەدۋيۋششيە HTML-تەگي ي اتريبۋتى: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>